Дубайнинг Business Bay ҳудудида янги рекорд ўрнатиши кутилаётган улкан турар жой осмонўпари қад ростламоқда. Burj Binghatti Jacob & Co Residences деб номланган лойиҳа шаҳарнинг навбатдаги архитектура рамзларидан бирига айланиши режалаштирилган.
Лойиҳага кўра, осмонўпарнинг баландлиги 557 метрга етади ва у 100 дан ортиқ қаватдан иборат бўлади.
Бино қуриб битказилса, ҳозирги энг баланд турар жой осмонўпарларидан бири бўлган Ню-Йоркдаги Central Park Towerʼдан баланд бўлади. Унинг баландлиги 472 метрни ташкил этади.
Шу тариқа, Дубайдаги янги мажмуа дунёдаги энг баланд турар жой осмонўпари мақомига даъвогар бўлади.
Лойиҳа Дубайнинг Binghatti Developers девелоперлик компанияси ҳамда Ню-Йоркда жойлашган заргарлик ва соат бренди Jacob & Co. ҳамкорлигида амалга оширилмоқда.
Burj Binghatti Jacob & Co Residences осмонўпар биносининг қурилиши / © Binghatti Developers
Дизайни қимматбаҳо тошлардан илҳомланган
Burj Binghatti Jacob & Co Residences фақат баландлиги билан эмас, ташқи кўриниши билан ҳам ажралиб туриши режалаштирилган.
Осмонўпар силуэтини яратишда Jacob & Co. соатларидаги мураккаб механизмлар ва заргарлик буюмларининг дизайн элементларидан илҳом олинган.
Бинонинг юқори қисми ромб шаклидаги шпиллар билан безатилади. Лойиҳа муаллифларининг ғоясига кўра, улар Дубай осмони фонида қирраланган қимматбаҳо тошларни эслатиши керак.
Шу тариқа, лойиҳада замонавий архитектура билан заргарлик дизайнини бирлаштиришга ҳаракат қилинган.
Burj Binghatti Jacob & Co Residences осмонўпар биносининг қурилиш жараёни / © Binghatti Developers
Қурилишни келаси йили якунлаш режалаштирилган
Янги эълон қилинган суратларда осмонўпар қурилиши қандай давом этаётганини кўриш мумкин. Манбада келтирилишича, бинода қурилиш ишларини келаси йили якунлаш режалаштирилган.
