Дунёдаги вазият: Австрияда вакцина олмаганлар учун локдаун, Германияда рекорд

Австрияда икки миллион киши вакцина олмагани учун локдаун шароитларида қолди. Қоида душанба куни кучга кирди: эмланмаганлар фақат айрим ҳолат, масалан, ишга бориш ёки маҳсулотлар харид қилиш учун уйдан чиқиши мумкин. Истисно фақат 12 ёшдан кичик болалар ва яқинда Covid-19 билан касалланган беморлар учун амал қилади.

Австриядаги одамларнинг фақат 65 фоизи тўлиқ эмланган

Расмийлар бундай чорани касалланиш ҳолатлари сони кўпайгани туфайли қабул қилди. Сўнгги етти кун ичида бу кўрсаткич ҳар 100 минг кишига 800та ҳолатни ташкил этмоқда. Бу эса Европадаги энг юқори кўрсаткичлардан бири.

Дам олиш кунлари чекловлар жорий этилишидан олдин Венада ҳукумат биноси олдида юзлаб одамлар қаршилик намойиши ўтказди. Уларнинг қўлида “Менинг танам. Ўзим ҳал қиламан” деб ёзилган плакатлар бор эди.

“Бу ерда юз бераётган воқеалар бутунлай камситувчидир”, - деди қаршилик намойиши иштирокчилари журналистларга. Намойишчиларни ўнг мухолифат партияси ҳам қўллаб-қувватлаяпти. Улар ҳукумат инсонларни биринчи ва иккинчи навга ажратяпти, деб ҳисобламоқда. Шифокорлар чоралар зарурлигини айтяпти: касалхоналарнинг жонлантириш бўлимлари тўлиб кетяпти, икки ҳафтадан кейин уларда жой бўлмаслиги мумкин.

Фуқароларнинг кўчада ҳаракатланишини полиция назорат қилади. Ходимлар турли жойлар, масалан, темирйўл станцияларида исталган кишининг вакцина олганлик ҳолатини текширади. Қоида бузганлар 500 евро жарима тўлайди. Текширувда иштирок этишдан бош тортганларга 1450 евро миқдорида жарима солинади.

“Исталган одам текширув объекти бўлиши мумкин”, - дея огоҳлантирди Австрия ички ишлар вазири. Эмланмаганлар учун бошланган локдаун вакцина марказларида ваҳима кўтарилишига сабаб бўлди.

Локдаун эълон қилингач, Австрияда эмлаш суръати ошди.

Германияда пандемия бошидан бери касалланиш ҳолатларининг энг юқори кўрсаткичи

Сўнгги ҳафта давомида 100 минг аҳолига инфекция юқтириш ҳолатлари сони 289тадан 303тага ортди. Бу эса пандемия бошидан бери кузатилган энг юқори кўрсаткич. Ўлимлар сони 43тага ортди ва 97 715 кишини ташкил қилди.

Германияда вакцина олиш кўрсаткичи 67,3 фоизни ташкил этяпти, бироқ бу жамоавий иммунитетни таъминлаш учун етарли эмас. Германия соғлиқни сақлаш вазири вакцина олмаганлар пандемияси ҳақида огоҳлантирди, федерал ҳукумат ва ўлкалар раҳбарлари жорий ҳафтада янги чекловларни муҳокама қилиш учун учрашиши керак.

Reuters агентлиги маълумотларига кўра, муҳокамалар одамлар ўртасидаги контактларни чеклаш, жумладан, мактабларни ёпиш ҳақида бўлади. Германия мамлакатга қўшни Австриядан келадиганлар учун ҳам мажбурий карантин жорий қилди.

Буюк Британияда 40 ёшлилар қайта вакцина олиши мумкин

Душанба кунидан бошлаб тўлиқ эмланган 40 ёшлилар коронавирусга қарши вакцинанинг бустер дозасини олиш ҳуқуқига эга. Бунга қадар фақат 50 ёшдан катта ва касаллик ҳамда ўлимнинг оғир бўлиши хавфини оширувчи касалликлари бўлган одамлар қайта эмланиш ҳуқуқига эга эди.

40 ёшдан катта бўлганлар қайта эмланиши учун вакцинанинг иккинчи дозасини олган вақтдан бошлаб камида олти ой кутишига тўғри келади. Қайта эмлаш учун Буюк Британияда Pfizer/BioNTech ва Moderna вакциналаридан фойдаланилмоқда.

Бундан ташқари, вакцинанинг фақат битта дозасини олиш ҳуқуқига эга бўлган 16-17 ёшли ўсмирлар иккинчи дозани олишлари мумкин.

Хорватия: россияликлар вакцина олиш учун оммавий тарзда келмоқда

Россияда аҳолининг қарийб 35 фоизи тўлиқ эмланган. Россияликлар фақат маҳаллий ишлаб чиқарилган вакциналарни олиши мумкин, улар ҳамма мамлакатларда ҳам тан олинмайди. Шунинг учун кўплаб россияликлар эмланиш учун Европа мамлакатларига боришяпти.

Сўнгги ҳафталарда Хорватия расмийлари ЕИда маъқулланган вакцинани олишни истайдиган россияликлар сони ортганини қайд этишди. Мамлакатдаги энг йирик вакцина маркази жойлашган Загребда ноябрь ойида 1000 нафар россиялик вакцина олган. Россияликларга келиш ва вакцина олиш учун ёрдам берувчи агентликлар талаб жуда катта эканини айтишяпти.

“Талаб ҳар куни ўсмоқда. Биз бу турларни сентябрь ойининг охирида таклиф эта бошладик. Дастлаб буюртмалар кўп эмасди, бироқ ҳозир кунига 50 нафаргача кишини брон қиламиз”, - дейди ана шундай хизматларни таклиф қилаётган компаниялардан бирининг вакили.