АПЛда «Челси» - «МЮ», Ла Лигада пешқадамлар тўқнашуви, А Серияда грандлар «жанги». Ҳафта ўйинлари анонси

Италияда «Наполи» ва «Милан»нинг пешқадамлиги вақтинчаликмиди? «Вест Ҳэм»нинг юриши тўхтадими? «Юнайтед»нинг муаммолари фақат Сульшерга боғлиқми? Испанияда энг яхши жамоа қайси? «Барселона» қачон гол уради? Бу ҳафтани қайсидир маънода жавоблар ҳафтаси деб аташ мумкин. Аввалги турлардан йиғилиб қолган саволлар ва аввалроқ содир бўлган натижаларнинг қай даражада асосли бўлганини айнан мана шу дам олиш кунларидаги ўйинлар очиқлаб беради.

А Серия. 14-тур

27 ноябрь (шанба)

ЮВЕНТУС – АТАЛАНТА

Ўйин бошланиш вақти: 22:00

ТВ-трансляция: Sport

Ўтган турда ҳам «Наполи», ҳам «Милан»нинг мағлубияти лигада интригани ошириб юборди ва таъқибчиларга умид берди. «Ювентус»ни ҳали чемпионлар пойгасидан узоқ деб ҳисобласак-да, жамоа салоҳияти А Серияда узоқ ғалабали серияни амалга оширишга етади. Бундай серия эса ҳар қандай жамоани пешқадамлар қаторига қўша олади.

Ҳар икки жамоа Чемпионлар Лигасининг навбатдаги турида омадсиз натижа қайд этгани ҳам бу ўйиннинг даражасини оширади. «Ювентус» муддатидан аввал плей-оффга чиққан бўлса-да, Лондондаги йирик мағлубият оғир бўлди ва энди туринликлар гуруҳда 1-ўринни ололмай қолишлари мумкин. «Аталанта» эса «Янг Бойз» билан дуранг ўйнаб қўйди ва энди кейинги босқич учун сўнгги турда «Вильярреал»ни енгишлари шарт.

«Ювентус» бу ўйинда ғалаба қозонса, «Аталанта»га, яъни кучли тўртликка 1 очко масофада яқинлашади. «Аталанта» эса А Сериядаги мағлубиятсиз сериясини 7 ўйингача ошириши ва пешқадамларни таъқиб этишда давом этишдан умидвор. Бергамоликлар кейинги сафар ўйинларини «Наполи» ва «Верона»га қарши ўтказишларини эътиборга олсак, имкон қадар мағлубиятга учрамаслиги керак. «Ювентус» бу томондан жуда яхши ҳолатда, агар Аллегри шогирдлари бугун ғалаба қозонишса, кейинги 5 тур жуда осон рақиблар билан ўтади – «Салернитана», «Венеция», «Болонья», «Кальяри» ва «Женоа». Демак, «Ювентус» етакчиларга яқинлашиб олиши учун қулай давр бошланмоқда.

«Аталанта» анчадан буён Италияда жиддий кучга айланган бўлса-да, айнан «Ювентус» билан ўйинларда у қадар ишончли эмаслигини таъкидлаш керак. Охирги ўн йилда А Серия доирасидаги фақат бир маротаба ўз майдонида ғалаба қозонган холос. Туриндаги ўйинларда эса вазият янада оғир, бир неча дуранглар қайд этилган бўлса-да, меҳмонларнинг охирги ғалабаси 1989 йилга тўғри келади.

Ла Лига. 15-тур

27 ноябрь (шанба)

ВИЛЬЯРРЕАЛ – БАРСЕЛОНА

Ўйин бошланиш вақти: 01:00

ТВ-трансляция: FutbolTV

Хави узоқ кутилган ва «Барселона» ўйини қисман яхшилана бошлагани кўринаётган бўлса-да, ҳозирча, айниқса олдинги чизиқда муаммолар ечилмади. Жамоа янги мураббий қўл остида икки ўйинда майдонга тушди ва фақат бир марта пенальтидан гол урди. Вазиятлар етарлича бўлмоқда, аммо ҳужумчиларнинг ёш ва тажрибасиз экани кўпинча панд бериб қўяётгандек.

«Вильярреал» эса Ла Лигада энг яхши ҳимояга эга бўлган жамоалардан бири бўлиб, гол ўтказиш бўйича 4-ўринда турибди. Лекин бошқача статистика ҳам бор – «Вильярреал» охирги марта «Барселона» устидан ғалаба қозонганда каталонияликлар таркибида Роналдиньо, «сариқлар» либосида эса Робер Пирес ва Маркус Сенна тўп сурарди. 2008 йилдан буён ўтган 26 учрашувда «Вильярреал» бирор марта ҳам «Барселона»ни юта олмай келяпти. Бу жамоалар ўртасидаги ўйин ҳақида гап кетса, беихтиёр икки йил олдинги 4:4 эсга келади. Ўшанда «Барселона» ўйин бошида 2 гол урган, сўнг мезбонлар қаторасига 4 гол уриб, ғалабани нақд қилган пайтда, қўшиб берилган дақиқаларда Месси ва Суарес ўйинни қутқариб қолишганди.

Жамоалар таркибига келсак, «Вильярреал»нинг етакчи тўпурари Жерар Морено ҳали тикланиб улгургани йўқ ва унинг йўқлиги жамоа натижаларига жиддий таъсир кўрсатмоқда. Юқорида ҳимоядаги ишончли кўрсаткичлар ҳақида сўз борди, аммо ҳужумда ишлар ёмон – 13 ўйинда атиги 15 гол. Ўтган йилги шу даврга нисбатан қарийб 2 баробар кам. Ўтган йилги шу пайтда Моренонинг ўзида 12 гол бор эди. «Барселона» таркибида Педри, Роберто, Фати ва Брейтгуэйтлар даволанишда давом этишмоқда, лекин Усмон Дембеленинг тиклангани яхши хабар, зеро франциялик ҳужумчи «Бенфика»га қарши ўйинда ҳам ўзига берилган дақиқаларда жуда ишончли ҳаракат қилди ва бир қатор хавфли вазиятлар юзага келтира олганди.

АПЛ. 13-тур

28 ноябрь (якшанба)

МАНЧЕСТЕР СИТИ – ВЕСТ ҲЭМ

Ўйин бошланиш вақти: 19:00

ТВ-трансляция: FutbolTV/UzReport

Гвардиола Англияга келганидан буён бирор марта ҳам «Вест Ҳэм»га мағлубиятга учрамаган. Атиги икки марта дуранг қайд этилган. Аммо мана шу дурангларда ҳам қайсидир маънода мағлубият бор – жамоалар яқинда Лига Кубоги доирасида ўзаро баҳслашишди ва ҳисоб очилмагач, «Вест Ҳэм» пенальтилар сериясида ғалаба қозонди. «Манчестер Сити» қаторасига 4 йилдан бери ютиб келаётган турнирдан чиқиб кетишга мажбур бўлди.

Ундан ташқари, жамоалар турнир жадвалида деярли қўшни, масалан «Вест Ҳэм» ғалаба қозонадиган бўлса, очколар сони бўйича етиб ҳам олади. 14-турга келиб шундай фикр айтилаётганининг ўзи «Вест Ҳэм» қай даражада юқори ўйин кўрсатаётганини билдиради. «Ливерпуль»нинг мавсумдаги ҳозирча ягона мағлубияти сабабчиси бўлган Мойес шогирдлари «Этиҳад»да ҳам осонликча таслим бўлмасликлари тахмин қилсак бўлади.

Ҳар икки жамоа ҳам ҳафта ўртасида еврокубокда майдонга тушди ва ғалаба қозонди. «Манчестер Сити» бир кун олдин ўз майдонида тўп сурди, «Вест Ҳэм» эса Венага сафар қилган бўлса-да, асосий таркибнинг асосий қисми дам олди. Яъни спорт формаси нуқтаи назаридан ҳар икки жамоада ҳам у қадар муаммо бўлмаслиги лозим.

Фақат «Манчестер Сити» олдинги чизиғида жароҳатланганлар кўп. Торрес, Грилишга қўшилиб, Фоден ҳам бу ўйиндан четда қолиши мумкин. Кевин Де Брюйне эса вирус юқтириб олди ва у ҳам яқин ўйинларда шерикларига ёрдам бера олмайди. Меҳмонлар таркибида эса Анжело Огбонна «Ливерпуль»га қарши оғир жароҳат олган ва у катта эҳтимол ушбу мавсумда майдонга туша олмайди.

АПЛ. 13-тур

28 ноябрь (якшанба)

ЧЕЛСИ – МАНЧЕСТЕР ЮНАЙТЕД

Ўйин бошланиш вақти: 21:30

ТВ-трансляция: FutbolTV/UzReport

Мавсум бошида бу икки жамоа чемпионликка даъвогар бўлган икки тенг кучли рақобатчи сифатида тилга олинаётган бўлса, ҳозир фарқ – ер билан осмон. «Челси» нафақат Англияда, балки Европада энг яхши ўйин намойиш этмоқда, Манчестер Юнайтед» эса бир қатор катта трансферлардан кейин ҳатто ўтган йилги ўйинини ҳам кўрсата олмаяпти ва Сульшерни истеъфога чиқарди.

АПЛда биринчи марта ва катта эҳтимол билан охирги марта Майкл Каррик жамоани майдонга олиб тушади. «Вильярреал»га қарши ўйинда жамоа ғалаба қозонган бўлса-да, муаммолар йўқолгани йўқ, бунинг устига таркибда ҳам етишмовчиликлар бор. Одатда «Юнайтед» топ-ўйинларда 5 ҳимоячи билан ўйнаб, сон жиҳатидан қаршилик кўрсатишга уриниб кўрарди, лекин ҳозирда Варан жароҳатда, Магуайр эса «Уотфорд»га қарши ўйинда майдондан четлатилганди. Таркибда уч марказий ҳимоячи схемаси учун сон жиҳатидан ҳам етарли кадр йўқ. Балки Шоу ёки Матич билан учинчи марказий ҳимоячи ўрни тўлдирилиши мумкин. Шунингдек, Мактоминей ҳам Шотландия миллий жамоасида шу позицияда тўп суришини эслаш мумкин. Яна, Кавани, Шоу ва Фреднинг Лондонда майдонга тушиши сўроқ остида, Погба ҳали тикланмади, Гринвуд эса вирус юқтириб олган.

«Челси»да ҳам таркибда муаммолар етарли. Лукаку тикланаётгани айтилса-да, ҳали майдонга тушгани йўқ. Ковачич жароҳатланган. Бу ўйин олдидан эса Бен Чиллуэлл ва Нголо Кантеларнинг ҳам сафдан чиққани маълум бўлди. Кантенинг жароҳати жиддий бўлмаса, Чиллуэлл ҳатто тўрт ойгача майдондан четда қолиши мумкин. Айнан қанот ўйинчилари ротацияси билан рақибларни чалғитаётган Тухель учун бу катта йўқотиш бўлиши мумкин. Шунингдек, Ҳаверцнинг тайёрлиги шубҳа остида қолганди, аммо мураббий унинг «МЮ» билан ўйинда майдонга туша олишини маълум қилди.

Жамоалар ўртасидаги ўтган мавсумдаги ҳар икки учрашув ҳам 0:0 ҳисобида якунланган. Умуман охирги 10 йилда ҳар томонлама тенглик: 11 тадан ғалаба ва 10 учрашув дуранг билан тугаган.

А Серия. 14-тур

28 ноябрь (якшанба)

НАПОЛИ – ЛАЦИО

Ўйин бошланиш вақти: 00:45

ТВ-трансляция: Sport

«Наполи»нинг ғалабасиз ўйинлари 3тага етди. Европа Лигасидаги мағлубиятни тушунса бўлади, жамоа агар баҳорда ҳам чемпионликка даъвогарлик қиладиган бўлса, бундай мусобақа фақат халақит беради. Аммо «Верона» билан дуранг ҳамда «Интер»дан мағлубият футболчиларнинг ўзига бўлган ишончига қаттиқ зарба бўлиши мумкин. Яхшиямки, «Милан» ҳам бу турларда очко йўқотди ва неаполликлар пешқадамликни сақлаб қолишди. Аммо яна бир йўқотиш нафақат «Милан» билан рақобатда панд бериши, балки пастдан қувлаб келаётган «Интер» ва «Аталанта»ни яқинлаштириб қўйиши мумкин. «Наполи» кейинги турда «Сассуоло» билан, декабрда яна «Аталанта» ва «Милан»га қарши, январнинг бошида эса «Ювентус» билан ўйнайди. Оғир синов даври давом этмоқда.

«Лацио» ҳам кучли тўртлик учун даъвогарлардан бири ва табиийки, очко зарур. «Ювентус»дан мағлубиятдан сўнг, жамоада ўртамиёналар орасига тушиб қолиш хавфи пайдо бўлди. Европа Лигасида «Локомотив» устидан ғалаба ва Чиро Иммобиленинг сафга қайтиши римликларга ижобий руҳият тақдим этиши мумкин.

«Наполи» юқорида тилга олинган оғир тақвим даврида таркибда муаммоларга дуч келганини ҳам таъкидлаш керак. Етакчи ҳужумчи Виктор Осимхен «Интер» билан ўйинда оғир жароҳат олди ва февралгача ёрдам бера олмаслиги аниқ. Политано ковиддан даволанди ва ҳали ҳам сафга қайтгани йўқ. Замбо-Ангисса мушакларидан жароҳат олди ва камида бир ҳафта майдонга туша олмаса керак. Меҳмонлар таркибида эса Адам Марушичда кичик жароҳат бор.

Ўтган мавсумда «Наполи» ўзи мезбонлик қилган ўйинда 5:2 ҳисобида чиройли ғалабага эришганди. Умуман уч йилдан бери бу жамоаларнинг ўзаро ўйинларида фақат мезбон жамоанинг ғалабаси қайд этиляпти.

Ла Лига. 15-тур

28 ноябрь (якшанба)

РЕАЛ – СЕВИЛЬЯ

Ўйин бошланиш вақти: 01:00

ТВ-трансляция: FutbolTV/UzReport

Агар Испания чемпионати турнир жадвалини айнан йўқотилган очколар бўйича тузсак, яъни ўйинлар сонини ҳам инобатга олсак, айнан мана шу икки жамоа биринчи ва иккинчи ўринларни эгаллаб турибди. Орадаги фарқ ҳам икки очко. Яъни бу ўйин натижаси Ла Лигадаги ҳақиқий пешқадамни ўзгартириши мумкин. Бир пайтлар «Реал»дан истеъфога чиқарилган Хуан Лопатеги албатта, чемпионлик рақобатида собиқ жамоасини енгишни кўпроқ истаса керак.

Нафақат бугунги кундаги очколар, балки кўп статистик кўрсаткичлар бўйича ҳам бу икки жамоа Испанияда етакчиларга хос ўйин намойиш этишмоқда. Дарвозага берилган зарбалар, хавфли вазиятлар бўйича бу икки жамоа пешқадам, ҳимоя борасида эса «Севилья» лигада энг кам – атиги 9 марта гол ўтказиб юборган холос. Юлдузларнинг ўйинга таъсири бўйича Европада энг яхшилардан бири бўлмиш «Реал» ва рақиб устунликларини йўққа чиқарган ҳолда натижа қайд этиш бўйича юқори даражали жамоа «Севилья» ўртасидаги кураш, албатта, нейтрал томошабинлар учун ҳам жуда қизиқ бўлса керак.

Таркибларга келсак, «Реал»да икки асосий марказий ҳимоячи – Милитао ва Алаба сафдан чиққан. Милитао бир неча ҳафтага йўқотилган бўлса, Алаба номаълум, балки шу ўйинда ҳам тайёр бўлиш эҳтимоли бор. «Севилья»да эса етакчи ҳимоячи Диего Карлос шерикларига ёрдам бера олмаслиги мумкин. Шунингдек, Хесус Навас ҳам мушакларидан жароҳат олиб, камида яна бир ҳафта майдонга қайта олмаса керак. Навас ушбу мавсумда шериклари учун қулай вазият (7та) яратиш бўйича Ла Лигада энг яхши кўрсаткичга эга. Унинг йўқлиги меҳмонларнинг ҳужумдаги салоҳиятига жиддий таъсир қилиши турган гап.

БОШҚА ЎЙИНЛАР

28 ноябрь. АРСЕНАЛ – Ньюкасл (17:30), Вольфсбург – БОРУССИЯ Д (19:30), ЛИВЕРПУЛЬ – Саутҳэмптон (20:00), БАВАРИЯ – Арминия (22:30), Венеция – ИНТЕР (28 ноябрга ўтар кечаси, 00:45).

29 ноябрь. Сент Этьен – ПСЖ (17:00), Бёрнли – ТОТТЕНҲЭМ (19:00), МИЛАН – Сассуоло (19:00), РОМА – Торино (22:00), ЛЕЙПЦИГ – Байер (21:30), Кадис – АТЛЕТИКО (22:30).