Сурхондарё ва Фарғонада ер сотишга уринган шахслар ушланди

Шеробод ва Ўзбекистон туманларида ер сотиш билан боғлиқ фирибгарлик ҳолатлари фош этилган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги департамент, ДХХ ҳамда ИИБнинг Ўзбекистон тумани бўлимлари томонидан тезкор тадбир ўтказилган. Тадбирда М.М. ва Ш.У. фуқаро К.нинг ишончига кириб, унга 7 600 АҚШ доллари эвазига “Сўх-Оқтепа” ирригация тизимига қарашли 60 сотих ер майдонини иссиқхона қуриш учун расмийлаштириб беришга келишиб, олдиндан 5 000 АҚШ долларини олган вақтида ашёвий далиллар билан ушланган.

Шунингдек, департаментнинг Шеробод туман бўлими томонидан ўтказилган терговга қадар текширувда ер сотишини айтиб фуқародан пул олган фермер Э.Э. ушланган.

Жумладан, у фуқаро Б.га ўзи раҳбарлик қилаётган “Ч.Қ.” фермер хўжалигига тегишли бўлган 1 050 гектар яйлов ҳамда 50 сотих сувли ерни 96 миллион сўмга танишлари орқали уй-жой қуриш учун ҳужжатларни расмийлаштириб беришга келишган. Келишилган суммадан 83 миллион сўм олган. Сўнг 2 миллион сўмни қайтариб берган ва бу ҳолат процессуал тартибда расмийлаштирилган.

Қайд этилишича, юқоридаги ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари ўтказилмоқда.