«Ютқазиб беришимиз учун рад қилиб бўлмас даражадаги катта пул таклиф қилишганди». Садриддин Абдуллаев билан эксклюзив интервью
|02:34 / 19.12.202157 03412 мин
Ўз вақтида «Пахтакор»да порлаган, жорий мавсум Тошкентнинг «Локомотив» клубида тўп сурган Садриддин Абдуллаев Tribuna.uz сайти мухбири билан очиқ ва самимий суҳбатда аввал ҳеч қачон айтмаган ҳақиқатларини рўй-рост сўзлади. Айтиш лозимки, унинг аччиқ ҳақиқатлари унча-мунча даврада очиқ айтилмайдиган гаплардир.
Фото: Tribuna.uz
У зўр футболчи бўлиши мумкин эди. Албатта, ҳозирги ҳолатидан зўрроқ. Фаолияти буткул бошқача ўтиши мумкин эди. Ўзининг таъбирича, уни катта футболга тайёрлаган мураббийининг энг иқтидорли ва севимли шогирдларидан эди. 1985-1987 йиллар авлодининг ёрқин вакилларидан эди. Аммо унинг карьераси ўзи орзу қилганидек бўлмади.
У тенги айрим футболчилар у эришгандан кўпроғига эришдилар. Маҳаллий ва Осиё даражасидаги юлдузга айландилар, маблағ борасида ҳам ундан омадлироқлар талайгина. Бироқ у барчасидан рози. Ўзининг кўнгли тўлиб-тўлмаган карьерасида фақат ўзини айблайди. Ва ҳаммаси тақдири азал эканига ишонади.
У олимпия жамоаси сафида Олимпиадага йўл ололмаган – ўша пайтдаги бебошлиги ортидан ҳал қилувчи ўйинлардан бирига жамоа билан бирга учиб кетолмаган. Ўша нохуш ҳолатдан сўнг айни кучга тўлган Абдуллаевнинг карьераси пастга қараб кета бошлади. Футболда ҳам, ҳаётда ҳам кўплаб хатоларга йўл қўйди. Режимга риоя қилмас, яхши пул топарди-ю, аммо кўчага сочар, тунги бетартиб ҳаёт уни аста-секин издан чиқарар, майдонда топганини ҳавога совурар эди. Спортчига хос бўлмаган ҳаёти туфайли жароҳатлари ҳам кўпайиб кетди. Ва айнан мана шу сабаблар туфайли жуда кўп нарсадан маҳрум бўлди.
Фото: Tribuna.uz
Суҳбат давомида у Ўзбекистон чемпионатини, ЎФА ва ПФЛни қаттиқ танқид қилди. Айни пайтда футболимизга масъул бўлганларга унинг эътирозлари анчайин йиғилиб қолган. Келишилган ўйинлар, тотализаторлар, бажарилмаётган ваъдалар ҳақида куйиниб гапирди. Жамоаси Ўзбекистон чемпионлигини қўлга киритган мавсум чемпионлик учун курашган рақиб жамоа томонидан футболчиларга катта пуллар таклиф қилишгани ҳақида сўзлаб берди. Нега жаҳон чемпионатига йўл ололмаётганимиз ҳақидаги саволга ҳам у рўй-рост ўз фикрини айтди. Айтиш лозимки, унинг аччиқ ҳақиқатлари унча-мунча даврада очиқ айтилмайдиган гаплардир. Айниқса, нима учун майдонга чиқмаётгани сабабини эшитсангиз, ҳайрон қоласиз.
Бу дафъа биз суҳбатлашган инсон Садриддин Абдуллаев. Фаолияти давомида деярли интервью бермаган Садриддин Tribuna.uz учун эксклюзив интервью учун рози бўлди ва айтиш лозимки, жуда кўп гапларни гапирди – интервью анча очиқ ва самимий бўлди. Ишончимиз комилки, Абдуллаев айтган гапларнинг айримлари сизни ҳайратлантиради, эҳтимол асабийлаштириб, тушкунликка ҳам туширар, позитив жиҳатларни ҳам топа оласиз. Қисқаси, «Локомотив» клуби ва Ўзбекистоннинг турли ёшдаги жамоаларида тўп тепган футболчи билан интервью сизни бефарқ қолдирмаслигига кафолат берамиз.
Мавзуга оид
«Ёлғон гапиришни ёқтирмайман»
- Интервью бермаслигим сабаби – ёлғон гапиришни ёқтирмайман. Дангал гапиришни яхши кўраман. Аммо дангал гапирсам, муаммо бўлади. Журналистларни ҳам ҳар хили бор. Ҳозир танқидий чиқишлар кўп, олдин бунақа эмасди. Олдин ҳамма нарса «хўжа кўрсин»га эди.
Ҳаётда футболдагидан бошқачаман. Майдонда тажаввузкор кўринишим мумкин, аммо ҳаётда бунақа эмас. Агрессив футбол ўйнамаган ўйинчи, фикримча яхши ўйинчи бўла олмайди. Футболчи майдонга чиқдими, ёниши керак. Ҳа, ёшлигимда жиззакироқ эдим, ҳозир эса майдонда унча-мунчага жаҳлим чиқмайди.
«Футболчи айбни ҳар доим ўзидан қидириши керак»
- Ўзимни ўзгартирдим, дея оламан. Ҳаётга тўғрироқ қарай бошладим. Ҳаётимда мусибатлар бўлди. Ўша воқеалар мен учун бурилиш нуқтаси бўлди. Мусибатлар, ҳаётимдаги воқеалар, майдондаги жароҳатлар ўзимни босиб олишга, айбни ўзимдан қидиришга сабаб бўлган. Ҳозирда кўп футболчилар айбни ўзидан қидирмайди. Аммо ўйинчи айбни ўзидан қидирмаса, ўсиши қийин бўлади.
Профессионал футбол ўйнашни 16 ёшимдан бошлаганим учун, пул ишлаб нотўғри йўлларда кўп юрганман. Аммо карьерамни янада яхшироқ қилишим мумкин эди. Нимадир менга армон бўлди, деган гапларни ёқтирмайман. Тақдирни бергани шу.
Ҳозирги ёшлар бизни авлод вакилларидан яхшироқ, ақллироқ деб ўйлайман. Уларнинг тарбияси, ўзини тутиши ҳам. Жамоаларда тўғри йўлдан юрадиган, ибодатни канда қилмайдиган йигитлар ҳозир кўп. Менимча, ҳаммаси оиладаги яхши тарбиядан. Клублар ҳам тажрибали ўйинчиларни нега жамоага олиб қолади? Таркибдаги ёш ўйинчиларга яхши ўрнак бўлиши учун.
«Ўша вақтларни эслагим ҳам келмайди»
- Хатолар? Ҳа, ҳаётда кўп хатолар бўлган. Ёшликда тунги клубларда юриб, кўп хато ишлар бўлган. Чунки атрофимизда ҳар хил дўстлар бор эди. Ҳозирга келиб уларни ажрата олдим. Беайб Парвардигор. Худога шукурки, ҳозир тўғри йўлдаман. Раҳматли дадам, у кишидан кейин катта акам доим назоратларида ушлаганлар. Шукурки ҳозир ҳаммаси яхши. Ўша вақтларни эслагим ҳам келмайди, очиғи.
Ёшлигимдан зўр ўйинчи бўлганман. Буни бемалол айта оламан. Буни биринчи мураббийларимдан Дилшод Нуралиевдан сўрашингиз ҳам мумкин. Ўзимизни тенгқурлардан биринчи бўлиб айнан мен катта футболда ўйнаб кетганман. Кейин эса Марат Бикмаев ўйнаган. Дилшод ака Нуралиев ҳалигача «Сендек иқтидорли ўйинчи кўрмадим» деб айтадилар. Умуман олганда, фаолиятим давомида ҳеч бир мураббийдан ёмонлик кўрмаганман. Ҳаммаси яхши муносабатда бўлган.
- Ўзбекистонга легионер ўйинчилар олиб келиши тарафдори эмасман. Чунки ўзимизда яхши ўйинчилар жуда кўп. Таклиф қилинадиган бўлса, зўр легионерлар чақирилиши керак. Айтайлик, Драган Черан, Боян Миладинович, Артур Геворкян, Гочкули Гочкулиев сингари легионерлар бўлса, катта ёрдами тегади, барқарор ўйин кўрсатишади. Қолган легионерлар унчамас. Улар ўрнига хорижлик мураббийларни кўпроқ чақириш керак. Уларнинг ёнига эса ёш маҳаллий мураббийлар ишлаши, ўрганиши лозим.
Легионер футболчиларнинг ҳаммаси ҳам «откат» учун чақирилмайди. Масалан, ўзига ишонган, яхши савиядаги легионерлар ҳеч қачон «откат»ларга аралашмайди.
«Ёшимни кичрайтирмаганман»
- Бизнинг авлодда ёшини ўзгартирган йигитлар йўқ эди. Азиз Ҳайдаров, Фарҳод Тожиев, Марат Бикмаев ҳам «тоза», ҳаммамиз – 1986 йилда туғилганмиз. Анзур Исмоилов ҳам ёшини ўзгартирмаган – 1985 йил у. Санжар Турсунов, Виталий Денисов – 1987 йилда туғилган, яъни ўзгартирмаган. Аммо ўшанда шунақа болалар бўларди – 4-5 йиллаб «ёшарган» бўларди. Ўша пайтда бундайлар жуда кўп бўларди. Ҳозир эса жуда камайди, дейиш мумкин.
«Гвардиолада Жамшиддек ўйинчи бўлганида, у Мессига айланарди»
- Ўзбекистонда мен кўрган энг яхши ўйинчи – Жамшид Искандеров. Жуда аққли футболчи. Бунақа ўйинчи кўрмаганман. Агар, Гвардиолада Жамшиддек ўйинчи бўлганида, у Мессига айланарди. Уни ҳозиргача Ўзбекистондаги энг ақлли ўйинчи, деб биламан. Жароҳат олиб кўп вақт ўйнай олмади, «Пахтакор»да Арвеладзе имкон бермади, ҳозир Жанубий Кореяда ўйнаяпти. Уни «олтин бош» деган бўлардим. Жуда ақлли ўйинчи.
«Ўзбекистоннинг 12 клуби ОФК лицензиясини олибди. Қандай қилиб?»
- Бу йил жуда кўп нарсага амин бўлдим. Узун соқол қўйган футболчи ўйнамасин, дейишди. Қанақасига? Бу ақлга сиғадиган нарсамас. Соқолини олсин дейишди. Футболчи сифатида ёшларга нотўғри ўрнак бўларканмиз... Бунга аралашиш кулгули-да! Чемпионатда 2-3та ўйин ўйнамай қўйдим, кейин секин сўрасам, шу нарса чиқиб келди. Майли, ўйнатмай қўя қол, ёш боламиман сенга... Футбол ўйнашга соқолни нима дахли бор, ҳайронман.
Ўзбекистоннинг 12 клуби ОФК лицензиясини олибди. Қандай қилиб? Майли, 4таси тортар, аммо бунча клуб тортмайди. Лицензия олиш учун ҳар томонлама тайёр бўлиши керак-ку клублар.
ПФЛ директори Диёр Имомхўжаев ҳам ишга келган пайтларида, «майдонларини тўғриламаса, клублар ўйнамайди» каби гапларни гапирганди. Аммо бу гапларни охиригача қилмади. Майдонларга қарасангиз – дабдала. Мазза қилиб футбол ўйнай олмайсиз. «Насаф», «Пахтакор», «Локомотив», «Навбаҳор» майдонига борсангиз, футбол ўйнайсиз. Бошқалар ҳам қилиши керак. «Турон» бекор чиқиб кетди Суперлигадан, зўр ишлаётганди. Шу клубни қолдириш керак эди. Барибир кимгадир «симпатия» бўлса, қолдиришарди-ю, аввал.
Ўзим ҳам «симпатия» билан чемпион бўлганманми? Ҳа, бўлган. Лекин 2018 йил «Локомотив» билан «Пахтакор»дан тортиб олган чемпионлигимиз ҳаққоний бўлган. Келишилган ўйинларимиз умуман бўлмаган. Ўша пайтда чемпионат форматини ўзгартиришганди ва биз кутилмаганда 1-ўринга чиқиб кетгандик. Ўзим мазза қилган чемпионлик ўша мавсум бўлган.
«Энг кўп пулни охирги марта «Пахтакор»да олганман»
- Охирги энг катта маошим «Пахтакор»да бўлган. 2018-19 йиллар эди. Энг катта йиллик маошим 150-200 минг АҚШ доллари эди. Бунгача ҳеч қачон бунча катта маош олмаганман. 16-17 ёшимда ҳам катта маош олгандим. 2015 йилда жароҳатдан кейин камроқ пулга ўйнаб, жисмоний ҳолатимни тиклаб олгандим. Шунга яраша ойлик маошим ҳам ошган.
«Энг яхши мураббий бўламан»
- Футболчилик фаолиятимдан кейин яхши мураббий бўла оламан. Камида Ўзбекистонда энг яхши мураббийлардан бирига айланишимга ишонаман. Мураббийлик курсларида ҳам ўқидим, тез орада «А» лицензияга ўқишим керак. Мураббийлик ишимни ўринбосарлар жамоасидан бошлайман.
Энг яхши мураббий? Ҳозир Темур Кападзе. Унинг иш услуби янги ва замонавий. Футболга нисбатан қарашлари ҳам янгича. Қолган кўп мураббийлар эски иш услубида ишламоқда.
Вадим Абрамов миллий жамоада нега ишлай олмади? Чунки эскича қарашлари билан қолиб кетган. Машғулотларни ўтказиш услуби ҳам эски эди. Эски мураббийлар футболчиларни техникаси, маҳоратига қараса, янги мураббийлар бошқа жиҳатларга кўпроқ эътибор беради. Ҳозир атлет бўлмасанг, футбол ўйнай олмайсан. Шу боис, ҳозир энг яхши услубда ишлаётган, натижа қилаётган мураббий Темур Кападзе.
Фото: FC Lokomotiv Tashkent
«Чемпионликни бериш учун катта пуллар таклиф қилишган»
- Келишилган ўйинларда иштирок этганманми? Бўлган. Бир марта. Ёшлигимда бўлганди, ўшанда Самарқандда ўйнардим, ўйинни беришимиз керак бўлган (2007 йил). Ундан кейинги клубларимда балки бошқа ўйинларни сотиб олгандирмиз, аммо буни билмаганман. Очиқ гапираман, чемпионликни бериш учун катта пуллар таклиф қилишган. Аммо бутун жамоа буни рад этганмиз. Бу қайси йил эди? 2018 йил эди, «Локо»да ўйнардим. Рад этиб бўлмас маблағ эди. Ўша ўйинда легионеримиз Каха Махарадзе ва бошқа ўйинчиларимизга ҳурматим ошган, - дейди Садриддин Абдуллаев суҳбат давомида.
