«Барселона» клуби жамоанинг бразилиялик яримҳимоячиси Филиппе Коутиньонинг ижараси бўйича «Астон Вилла» билан келишувга эришилганини маълум қилди.
Каталония клуби расмий сайти хабарига кўра, Коутиньо мавсумнинг иккинчи қисмини ижара асосида «Астон Вилла»да ўтказади. Келишувда футболчини сотиб олиш ҳуқуқи ҳам киритилган. Шунингдек, Коутиньонинг маоши катталиги сабабли «Барса» маблағнинг маълум қисмини тўлашда давом этади.
Қайд этилишича, бразилиялик 29 ёшли футболчи Буюк Британияда ишлаш визасини олгач, Бирмингем клубида тиббий кўрикдан ўтади.
Эслатиб ўтамиз, Коутиньо 2018 йилда 135 миллион евро эвазига «Ливерпул»дан «Барселона»га ўтганди. Филиппе Каталония клубида 106 ўйинда 25та гол, 14та ассистга муаллифлик қилган. У 2019/20 йилги мавсумнинг иккинчи қисмини ижара асосида «Бавария»да ўтказган эди.
