Жиззахда фуқарони Мексика орқали АҚШга, Фарғонада Кореяга юбормоқчи бўлган шахслар ушланди

Бош прокуратура ҳузуридаги департамент ҳамда ДХХ Жиззах вилояти бошқармалари томонидан ўтказилган тезкор тадбирда, фуқаро Ш.Ш. фуқаро Ж.нинг ишончига кириб, уни танишлари ёрдамида Туркия, Италия ёки Мексика давлатлари орқали айланма йўллар билан АҚШ ҳудудига олиб ўтиши ва ушбу давлатда ишга жойлаштириб қўйиш эвазига 20 000 доллар олган вақтда ашёвий далиллар билан ушланган.

Шунингдек, департаментнинг Фарғона шаҳар бўлими томонидан ДХХ ва ИИБ билан ҳамкорликда ўтказилган тезкор тадбирда, фуқаро А.С. фуқаро Н.ни ишончига кириб, 3,5 минг доллар эвазига уни Кореяга ишга жўнатишни ваъда қилиб, олдиндан 300 доллар ва 500 минг сўмни олган вақтида ашёвий далиллар билан ушланган.

Қайд этилишича, мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.

Аввалроқ, Самарқандда фуқароларни Боливия, Колумбия ва Мексика орқали Америкага юбормоқчи бўлган гуруҳ аъзолари қўлга олинганди.