Муроджон Азимов келажак хавфи бўлган қум бўронларидан огоҳлантириб, Қашқадарё аҳлига мурожаат қилди

Қашқадарё вилояти ҳокими Муроджон Азимов вилоят аҳолисига мурожаат қилди. У вилоятда кўчат экиш анъанасини кенг оммалаштириш, ҳудудда яшилликни кўпайтириб, йирик боғлар яратиш таклифини илгари сурган.

Азимов мамлакат бўйлаб Президент раҳбарлигида амалга оширилаётган ислоҳотларга урғу берар экан, айниқса она табиатни асраш ва табиий ресурслардан самарали фойдаланиш давлат сиёсати даражасига кўтарилганини таъкидлаган.

“Азал-азалдан кўчат эккан, боғ яратган инсонларга халқимиз алоҳида эҳтиром билан қараб, улуғлаб келади.

Ўз навбатида, баҳор эшик қоқаётган шу кунларда вилоятимизнинг ҳар бир фуқаросининг ён-атрофни хушманзара бўлишига ҳисса қўшишини хоҳлаймиз.

Кўчат экиш, гул-у ниҳолларни кўпайтириш бу – мусаффолик, экологик муҳит софлиги ҳамда она табиатга ғамхўрлик ва инсонийликнинг юксак намунасидир!

Энг муҳими, шу тоза ҳаводан ўзингиз, оила аъзоларингиз, борингки келажакда невара-эвараларингиз нафас олади. Ёнига фарзанди, невараларини олиб кўчат эккан ҳамюртимиз уларга ибрат бўлади, бу қадриятнинг давомли бўлишини таъминлайди.

Агар “экологик муҳит ифлосланди” ёки “бузилди” деб қўл қовуштириб тураверсак, кейинги 5-10 йилликда аҳвол қандай бўлади? Бир ўйлаб кўринг.

Ҳурматли воҳадошлар, азиз ёшлар!

Ҳадиси шарифда бизга ато этилган неъматларни, она табиатни асраб-авайлаш, кўчат экиш, боғ яратиш, иймоннинг ярми экани, экилган ҳар бир дарахтнинг мевасидан ёки соясидан бошқалар баҳраманд бўлса, уни эккан кишига савоб ёзилиши ҳақида айтилади.

Вилоятимизнинг барча ҳудудларида “Яшил макон” умуммиллий лойиҳаси доирасида кенг кўламли ишларни амалга ошириш белгилаб олинган.

Мавжуд 796 та маҳалла ва 13 800 дан ортиқ кўчаларни обод қилиш, мевали ва манзарали дарахт кўчатларини экиш, боғ барпо этиш, она табиатни асрашга ўз ҳиссамизни қўшиш бўйича дастур ишлаб чиқилди.

Вилоятимизнинг тупроқ-иқлим шароитидан келиб чиқиб, ўтган йил куз мавсуми ва жорий йилнинг баҳор мавсумида 16 млн 356 минг дона мевали ва манзарали кўчатлар экишни режа қилиб олганмиз.

Шу ўринда, олимларимиз ва мутахассисларимиз билан маслаҳатлашган ҳолда, вилоятнинг:

чўл ҳудудларида иссиқ гармсел ва қурғоқчиликка чидамлилиги учун қайрағоч (гужум), чинор, бодом дарахтлари;

шўрланишга қарши тут, сувсизликка чидамли саксовул, ясен (шумтол), япон сафораси дарахтлари;

тоғли ҳудудларида дуб, игна баргли дарахтлар (арчадошлар) барча турлари, лола дарахти, япон сапораси дарахтлари экилмоқда.

Ҳозиргача вилоят бўйича 7 млн 285 минг туп манзарали, мевали дарахт, буталар кўчатлари ҳамда қаламчалари экилди.

“Яшил макон” умуммиллий лойиҳасини амалга оширишда вилоят марказидан тортиб чекка туманларгача бўлган ҳудудларда ҳашарлар ташкил этилмоқда. Бизни мамнун этаётгани, мазкур эзгу ва хайрли ишда етти ёшдан, етмиш ёшгача бўлган аҳоли вакиллари ҳам фаол иштирок этишмоқда. Жумладан,

Қарши - Самарқанд йўлида жойлашган 37 гектарлик Қўнғиртоғ маиший чиқинди полигонида ободонлаштириш ишлари олиб борилди. 24 гектар ер майдонига 17 минг дона дарахт ва бута кўчати экилди.

Ушбу дарахтларни экиш режасида дастлаб суғориш масаласини ҳал қилиш бўйича аниқ ҳисоб-китоблар ишлаб чиқилган. Сув манбаидан полигонгача бўлган 4 км узунликдаги масофага Аму-Қашқадарё ҳавза бошқармаси томонидан 1,6 млрд сўмлик қувурлар тортиш ишлари олиб борилмоқда.

Ташкил этиладиган боғнинг ўзида томчилатиб суғориш тизимини жорий қилиш мақсадида маҳаллий бюджетдан зарур маблағлар ажратилмоқда.

Азизлар, вилоятимизда кўчатчилик тармоғини ривожлантиришга ҳам алоҳида эътибор қаратяпмиз. Жорий йилнинг баҳорида 9 млн донадан ортиқ кўчатлар экилади.

Келгусида, талаб этиладиган кўчатни тўлиқ ўзимизда етиштириш мақсадида 2022 йилда ўрмон хўжаликларининг 65 гектар майдонида янгидан ниҳолхона ва кўчатхоналар ташкил қилиб, 18 млн дона ниҳол ҳамда кўчатлар етиштириш режаларимиз ҳам бор.

Шунингдек, жорий йилда 152 гектар майдонда “Янги Ўзбекистон” боғлари, 37,8 гектар “яшил боғлар” 22,5 гектар “яшил жамоат парклари” ҳамда бир турдаги дарахт ва бута кўчатларини экиш орқали "каштан кўчаси", "чинор кўчаси” каби дарахт номлари билан аталувчи 58 та намунавий кўчалар ташкил этилади.

Дарахт экканимиз билан у ўз-ўзидан кўкариб қолмайди. Аслида экишдан ҳам кўра уни кўкартириш биздан алоҳида ғамхўрликни талаб қилади. Кўчатларнинг тўлиқ кўкаришини таъминлаш учун томчилатиб суғориш технологияси жорий қилинади.

Бунинг учун 693 км (шундан, 360 км автомобил йўллари ёқаси, 221 км фермерлар дала четига, 110 км маҳаллалар ҳудуди ва аҳоли хонадонлари) суғориш тизими барпо қилинади.

Суғориш тизимини йўлга қўйиш учун 41 дона суғориш қудуғи, 39 дона насос агрегати ва 360 км қўшимча суғориш тармоғини қуриш ҳамда 76 км узунликдаги кўчатларга томчилатиб суғориш технологияси жорий қилинади” деган Қашқадарё ҳокими.

Муроджон Азимов ўз мурожаатида кейинги йилларда иқлим ўзгариши кузатилиб, қум ва чанг бўронлари кучайгани ташвишли эканига эътибор қаратган. Аммо бу экологик ҳолатни четдан келиб биров бизга яхшилаб бермаслиги, кимдир дарахт экиб боғ яратиб бермаслигини айтган.

“Барчангизни, нафақат экология, балки инсон саломатлиги, ёшлар тарбиясида беқиёс аҳамияти бўлган бу умуммиллий лойиҳани соғлиқни сақлаш муассасалари, мактаб ва мактабгача таълим ташкилотларида алоҳида тараддуд билан олиб бориш, ҳар бир уйда, ҳар бир маҳаллада ҳашарлар ташкил этиб, бу оммавий тадбирга муносиб ҳисса қўшишга чақираман.

Келинг, азиз юртдошлар, “Яшил макон” умуммиллий лойиҳасини амалга оширишда фаол иштирок этайлик”, дея мурожаат қилган Азимов Қашқадарё халқига.

Қашқадарё вилояти ҳокимлиги ахборот хизмати Ⓣ