Сардобада фуқароларнинг маблағини ўзлаштирган банк ходимларига жиноят иши қўзғатилди

Бош прокуратура ҳузуридаги департаментнинг хабар беришича, департаментнинг Сардоба тумани бўлими томонидан АТ “Халқ банки” Сардоба филиалининг мурожаатига асосан терговга қадар текширув ўтказилган.

Текширувда аниқланишича, АТ “Халқ банки” Сардоба филиали собиқ ходимлари А.М., Н.С., О.Т. ва бошқалар ўзаро тил бириктириб, 54 нафар фуқаронинг хабардорлигисиз улар номига 1,2 миллиард сўм кредит ажратилишига эришиб, ўзганинг мулкини фирибгарлик йўли билан қўлга киритган.

Бундан ташқари, улар 7 нафар банк мижозлари томонидан кредит қарздорлигини сўндириш мақсадида топширилган 18 миллион сўм нақд пулни банк кассасига кирим қилмасдан шахсий эҳтиёжлари учун сарфлаб юборган.

Қайд этилишича, мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.

Аввалроқ Қашқадарёда банк ходими 539 нафар фуқарога сохта квитанция бериб пулларни ўзлаштиргани аниқланганди.