Qashqadaryoda bank xodimi 539 nafar fuqaroga soxta kvitansiya berib pullarni o‘zlashtirgani aniqlandi

Bosh prokuratura huzuridagi departamentning xabar berishicha, departamentning Qamashi tuman bo‘limi tomonidan tumandagi tijorat bankining murojaatiga asosan tergovga qadar tekshiruv o‘tkazilgan.

Tekshiruvda aniqlanishicha, filialning sobiq xodimi S.T. fuqaro F.N. bilan o‘zaro til biriktirib, 539 nafar fuqaroga o‘zlarini go‘yoki G‘uzor tumani IIB YHXBga to‘lovlarni qabul qiluvchi xodim sifatida tanishtirgan. So‘ng odamlarning jami 216 million so‘m to‘lovlarini naqd pulda qabul qilib, evaziga bank muassasasining soxta kvitansiyalarini taqdim etib, pullarni talon-toroj qilgan.

Qayd etilishicha, mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Surxondaryoda qalbaki kvitansiya bilan fuqaroning 30 million so‘m pulini o‘zlashtirgan bank xodimiga jinoyat ishi qo‘zg‘atilgandi.