100 дан ортиқ қадимий китобни ноқонуний равишда пойтахтга олиб кираётган шахс ушланди

Nexia-1 автомашинаси ичидан 106 дона (ҳеч қандай тегишли ҳужжати бўлмаган, диний мазмундаги) араб ёзувида ёзилган қадимий китоб аниқланган. Бу ҳақда Тошкент вилояти ЙҲХБ хабар бермоқда.

Қайд этилишича, 17 март куни соат тахминан 10:00 ларда Оҳангарон туманида жойлашган Чинор ЙПХ масканида хизмат олиб бораётган ЙПХ ходимлари томонидан, ҳайдовчи M.A. бошқарувида «Қўқон-Тошкент» йўналиши бўйлаб ҳаракатланиб келаётган, шубҳали кўринган Nexia-1 русумли транспорт воситаси тўхтатилган.

Текширув давомида ушбу машинада йўловчи бўлган, 1994 йилда туғилган фуқаро М.В. 106 дона (ҳеч қандай тегишли ҳужжати бўлмаган, диний мазмундаги) араб ёзувида ёзилган қадимий китобни Тошкент шаҳрига олиб кетаётгани аниқланган.

Ҳозирда мазкур ҳолат юзасидан туман ИИБ томонидан терговга қадар текширув ҳаракатлари олиб борилмоқда. Шунингдек, экспертиза ҳам тайинланган.