2022 йил 20 апрел куни кучли ёмғир ёғиши натижасида Самарқанд ва Жиззах вилоятининг бир қатор туманларида сел келиш ҳолатлари кузатилди ва ҳудудларни сув босди.
Жумладан, Фориш туманининг тоғли ҳудудлари ва адирликларида содир бўлган сел оқими “Эгизбулоқ” МФЙда жойлашган 260 та хўжаликдан ўтиб, уларнинг 53 таси тўлиқ, 44 таси ўрта ва 163 таси енгил даражада талафот кўрган.
Қутқарувчилар томонидан 6 нафар фуқаро сел оқимлари ичидан қутқарилиб, Фориш тумани тиббиёт бирлашмасига ётқизилган. 4 киши селда оқиб ҳалок бўлган. Олиб борилган тезкор-қидирув тадбирлари натижасида 2022 йил 21 апрел куни бедарак йўқолгани айтилган фуқаронинг сувга чўкиб вафот этгани аниқланиб, унинг мурдаси топилган.
Сел оқими 15-сон умумтаълим мактаби ва 9-сон мактабгача таълим муассасаси ҳудудига (биноларнинг 1-қаватига) ҳам кирган. 1,5 километр ички йўлларга сел сувлари тошиши оқибатида транспорт воситалари ҳаракати вақтинчалик тўхтатилган.
