Ширин шаҳри ва Бекобод туманини боғловчи муҳим кўприк вақтинчалик ёпилади

Ширин шаҳридан Бекобод туманига борувчи фуқаролар вақтинча «Дўстлик» ирригация тармоғига қарашли кўприкдан ўтиб қайтиб туришади.

Фото: Ширин шаҳри ҳокимлиги

Сирдарё вилояти ҳокимлиги ахборот хизматининг хабар беришича, Вазирлар Маҳкамасининг «Фарҳод» гидроэлектрстанциясини модернизация қилиш тўғрисида»ги қарорига асосан мазкур ГЭСни модернизация ва қайта техник жиҳозлаш ишлари амалга оширилган.

Ушбу модернизация ишларини сифатли ҳамда ўз вақтида бажариш мақсадида жорий йил11 май соат 8:00 дан 15 май соат 17:00 га қадар ГЭС ҳудудида жойлашган Ширин-Бекобод йўналишидаги кўприк вақтинча ёпилади.

Сирдарё вилояти ҳокимлиги ахборот хизматининг Kun.uz’га маълум қилишича, Ширин шаҳридан Бекобод туманига борувчи фуқаролар шаҳар яқинида жойлашган «Дўстлик» ирригация тармоғига қарашли бошқа бир кўприкдан вақтинча фойдаланиб туришади.

«Вақтинча ёпилган кўприк билан «Дўстлик» ирригация тармоғига қарашли кўприкнинг ораси унча узоқ эмас. Вақтинча ёпилган кўприк орқали борилганда Ширин шаҳридан Бекобод шаҳригача 14-15 километр йўл юрилади. «Дўстлик» ирригация тармоғига қарашли кўприк билан борилганда масофа 19-20 километрни ташкил этади», дейди вилоят ҳокимлиги ахборот хизмати.