Сурхондарёда сел оқизиб кетган икки кишининг жасади топилди

Сурхондарё вилояти Сариосиё туманида сел оқизиб кетган икки фуқаронинг жасади топилди. Бу ҳақда ФВВ матбуот хизмати хабар берди.

10 май куни соат 16:00 лар атрофида туманнинг тоғли ҳудуди «Боғистон» МФЙ, Зохона қишлоғида қисқа муддатли кучли ёмғир ёғиши натижасида сел оқими ҳодисаси юзага келган, ҳодиса оқибатида ушбу ҳудудда Nexia автомобилида бўлган, Узун туманида яшовчи икки киши, шунингдек, чорва молларни боқиб юрган фуқаро ва унинг чорва молларини ҳам сел оқизиб кетганди. Кейинроқ чўпон офатдан қутулиб қолгани маълум бўлган, қолган икки кишини қидириш ишлари олиб борилаётгани айтилганди.

Маълум қилинишича, ФВВ қутқарувчилари ва ҳамкорликдаги ташкилотлар билан олиб борилган қидирув-қутқарув ва сел оқими оқибатларини бартараф этиш жараёнида автомобил ва бир кишининг жасади Тўпаланг дарёси ўзанидан топилди.

Қўшимча қилинишича, айни вақтда Тўпаланг дарёси ўзанидан иккинчи фуқаронинг жасади олиб чиқилмоқда, иккинчи фуқаронинг жасади биринчи фуқаро жасади топилган жойдан тахминан 5 километр қуйидан топилди.

Воқеа жойида ФВБ қутқарувчилари, Миллий Гвардия, Ички ишлар ва тегишли хизматлар ходимлари томонидан қидирув-қутқарув ва сел оқими оқибатларини бартараф этиш ишлари давом эттирилмоқда.