Молдованинг собиқ президенти давлатга хиёнатда гумонланмоқда. У қўлга олинади

Сешанба тонгида собиқ президентнинг уйида тинтув ўтказилаётгани хабар қилинди.

Бош прокуратура тинтув «кулек иши» бўйича олиб борилаётганини маълум қилган.

Гап Молдова Демократик партияси офисида 2019 йилда олинган видеотасвирлар ҳақида кетмоқда. Видеода партия раҳбари, олигарх Владимир Плахотнюк Додон пакет (кулка) узатаётгани кўринади, унда пул бўлгани айтилади. Додоннинг Плахотнюк билан суҳбатидан бу пуллар Молдова социалистлар партиясини молиялаштириш учун мўлжаллангани англашилади. Додон социалистлар партиясига раҳбарлик қилган.

Додон 2016 йил декабридан 2020 йил декабрига қадар Молдова президенти бўлган. У Россия билан яқиндан ҳамкорлик қилишга интилган ва россияликлар президенти Владимир Путин билан бир неча бор учрашган. Додон Молдова президенти сифатидаги илк хорижий сафарини 2017 йил январида Москвага амалга оширган. Ўша йилнинг 9 майида у Қизил майдондаги Ғалаба парадида иштирок этган ягона хорижий президент бўлганди.

2020 йил ноябрида президентлик сайловларининг иккинчи турида Додон ғарбпараст номзод сифатида кўрилган Майя Сандуга ютқазди.

Молдова бош прокуратураси маълумотига кўра, собиқ президент Жиноят кодексининг тўрт моддаси бўйича гумонланмоқда: давлатга хиёнат, пассив коррупция, партияни криминал ташкилот томонидан молиялаштириш ҳамда ноқонуний бойлик орттириш.

«Додонга тегишли бўлган уйлар ва биноларда тинтувлар ўтказилмоқда. У 72 соатга ҳибсга олинди», деди Керпек (иқтибос Интерфаксники).

Керпекнинг сўзларига кўра, тинтувлар бошқа жойларда ҳам, шу жумладан, «воситачиларга тегишли кўчмас мулк объектлари»да олиб борилмоқда.

Тергов тадбирлари куннинг иккинчи ярмида ҳам давом этган. Бош прокуратуранинг кейинроқ аниқлик киритишича, ҳозирча Додон қўлга олинмаган.

Ушбу видео Молдова парламентининг собиқ депутати Юри Ренита томонидан 2020 йилда эълон қилинган. Унда Плахотнюк ва ўринбосари Сергей Яралов Додонга пакет топширади. Ренитанинг таъкидлашича, учрашув 2019 йилда бўлиб ўтган, пакетда катта миқдордаги пул бор бўлган.

Видеода Додон Плахотнюка «пакетни Костага топшириш»ни сўрайди (тахминларга кўра, Молдова Демократик партиясидан собиқ депутат Константин Ботнарю), у эса ўз навбатида «Корнелу»га узатиши керак эди (тахминларга кўра, социалистик партия аъзоси Корнелиу Фуркулицэ). Додон «пулларни дарҳол Корнелиуга етказиш кераклиги, у социалистик партия фаолларига тўлов қилиши»ни айтади.

Ўтган ҳафтада бош прокурор в.б Дмитрий Робу шов-шувли «кулка» можароси бўйича жиноий иш қўзғатганди. У 2020 йил майида етарлича далиллар йўқлиги туфайли бу иш бўйича жиноий иш очишдан бош тортгач лавозимидан четлатилган бош прокурор Александр Стояноглонинг буйруғини бекор қилди. 2021 йил 5 октябрида Стояноглонинг ўзи коррупция иши бўйича қўлга олинди.

Плахотнюк Молдовада коррупция тимсоли ва Додон президентлиги даврида мухолифатчиларнинг асосий танқидлари объектига айланганди. У мамлакатни тарк этган. Москвадаги Басман суди 2018 йилда Плахотнюкни қотилликка уриниш айблови бўйича сиртдан ҳибсга олганди.

Додон ўтган ҳафтада Молдовадан кетишга ҳозирланмаётгани ва ҳозирги ҳукуматга қарши курашиш ниятида эканини айтганди.

«Улар менга қарши нимадир қилишлари мумкин, тинтув ўтказишлари мумкин, мени «асоссиз равишда» қанчадир вақтга  қамоққа олишлари мумкин. Аммо мени қўрқита олишмайди, мен мамлакатдан кетмоқчи ёки яширинмоқчи эмасман», дея унинг телеэфирдаги чиқишидан иқтибос келтирган Интерфакс.