«Қанча керак бўлса, шунча вақтгача елкама-елка турамиз» — G7 Украинани ғалабага қадар қўллашни ваъда қилди

Дунёнинг етакчи демократик державалари етакчилари Германиядаги саммитда Россия билан урушда Украинани қанча керак бўлса, шунча қўллаш ваъда қилинган баёнотни қабул қилишди.

«Биз молиявий, гуманитар, ҳарбий ва дипломатик ёрдам кўрсатишда давом этамиз ҳамда қанча вақт талаб этилса шунча вақт давомида Украина билан елкама-елка турамиз», дейилади АҚШ, Германия, Япония, Британия, Франция, Италия ва Канада раҳбарлари баёнотида.

Муфассал ва қатъий тузилган баёнотда «еттилик» давлатлари етакчилари Россия ва Беларусга санкциялар босимини оширишни ҳам ваъда қилишган.

«Биз президент Путин ва унинг Беларусдаги шериклари режимига иқтисодий ва сиёсий босимни сақлаб қолиш ва кучайтиришда давом этамиз, шу йўл билан Россияни Украинага қарши босқинчилик уруши олиб бориш учун иқтисодий воситалардан маҳрум қиламиз, биз бундан кейин ҳам ҳар бир босқичда ҳамжиҳатликда ҳаракатланган ҳолда қанча керак бўлса шунга қадар мақсадли санкцияларни биргаликда қўллашда давом этамиз», дейилади баёнотда.

«Еттилик» мамлакатлари Россия олтинига эмбарго қўйишга, санкцияларни айланиб ўтишга уринишларга қарши курашишга, Россия экспортига бож тарифларини жорий этишни мувофиқлаштиришга ва ушбу тарифлардан тушган маблағни ўз қонунларини бузмаган ҳолда Украинага бериш масаласини кўриб чиқишга ваъда беришган.

Бундан ташқари, G7 мамлакатлари россиялик сиёсий муҳожирларга ёрдам кўрсатмоқчи. Баёнотда бу борада қисқача тўхталиб ўтилган: «Биз ички қонунларимиз ва талабларимиз асосида Россия режими таъқибига учраган россияликларга ҳимоя тақдим этамиз».

«Еттилик» шунингдек Кремлдан озиқ-овқат экспорти тикланиши учун украин портлари блокадасини ечишни талаб қилган. «Биз Россияни ҳеч қандай шартларсиз қишлоқ хўжалиги ва транспорт инфратузилмаларига ҳужумларни зудлик билан тўхтатишга ва Украина портлари орқали қишлоқ хўжалиги маҳсулотлари эркин ўтишини таъминлашга чақирамиз», дейилган баёнотда.

Урушни қишга қадар якунлаш

Украина президенти Володимир Зеленский ҳам саммит иштирокчилари билан видеоалоқа орқали боғланган. У яна бир бор иттифоқчилардан оғир қуроллар етказиб беришни тезлатиш ва ҳажмини оширишни сўраган - унинг сўзларига кўра, шунда Украина урушни қишга қадар якунлаши мумкин бўлади.

BBC’нинг Берлиндаги корреспонденти Женни Ҳиллнинг қайд этишича, баёнотнинг қатъий формулировкаси етакчи демократик державалар Украинани қўллаш ва Россияни қоралашда якдил эканини, Европа етакчилари иккилана бошлагани ва урушни қандай қилиб бўлмасин тўхтатиш ҳақида ўйлаётгани тўғрисидаги хабарлар асоссизлигини кўрсатади.

«Твиттерда Германия канцлери Олаф Шольцнинг ёзишича, олдинда - мураккаб, аммо зарур қарорлар турибди», дея эслатади BBC корреспонденти.

Буюк Британия бош вазири Борис Жонсон BBC билан суҳбатда айтишича, «эркинлик ҳар қанча қурбонликка арзийди» ва Украинани қўллаб-қувватлаш - Ғарбдаги иттифоқчилар қилаётган тўловдир.