«Замонавий қуроллар билан қайтамиз» – Зеленский Лисичанск бой берилганини тасдиқлади

Украина президенти Володимир Зеленский 4 июлга ўтар кечаси қилган кунлик мурожаатида мамлакат армияси Луганск областидаги охирги йирик шаҳар бўлмиш Лисичанскдан чиқиб кетганини тасдиқлади. Аввалроқ Россия Мудофаа вазирлиги шаҳар руслар қўлига ўтганини эълон қилган, кейинроқ бу маълумотни Украина бош штаби тасдиқлаганди.

Зеленский Украина албатта руслар босиб олган ерларини ҳарбий тактика ва замонавий қуроллар ёрдамида қайтариб олишини айтди. «Украина ерларини бериб қўймайди. Кимдир Москвада Луганск области ҳақида гапираётганда 24 февралгача берган ваъдаларини эсласин. Улар ҳозир нимага эгалик қилаётгани ва бу учун қанча тўлаганини ҳисоблаб кўрсин», деди Украина етакчиси.

Ғарб экспертларининг айтишича, Россия апрелда бошланган «Донбассдаги катта жанг» давомида Луганск областининг унча катта бўлмаган қисминигина эгаллаган. Хусусан, кескин жанглар ўтган Северодонецк ва Лисичанск шаҳарларини. Бу шаҳарларни олиш учун Россия кутилганидан ҳам кўпроқ қурол ва шахсий таркиб бўйича йўқотишларга учраган.

Ўз навбатида, Украина ҳам бу шаҳарлар мудофааси вақтида катта йўқотишларга учради. Украина томонининг айтишича, Россия ҳудудда қурол-яроғ бўйича катта устунликка эга ва шу сабаб Украина армиясини сиқувга олиб урушмоқда.

«Биз жангчиларимизнинг ҳаётини эҳтиётлаймиз. Агар армиямиз қўмондонлиги душман катта устунликка эга бўлаётган фронтнинг маълум участкаларидан - бу Лисичанскка ҳам тааллуқли - одамларни олиб кетишга қарор қилдими, демак биз у ерга ҳарбий тактика ва замонавий қуролларимиз билан қайтамиз», деди Зеленский.

Украина қуролли кучлари Бош штаби Лисичанскдаги ҳолат бўйича муносабат билдирган. «Россиянинг босқинчи қўшини артиллерия, авиация, баравар ўт очиш реактив тизимлари, ўқ-дори ва шахсий таркиб борасида устунликка эга бўалаётган бир вақтда шаҳар мудофаасида қолиш катта йўқотишларга сабаб бўларди. Украина ҳимоячиларининг ҳаётини сақлаб қолиш мақсадида чекинишга қарор қилинди», дейилади штаб баёнотида.

Баёнотида ёзилишича, Украина армияси жанг қилишда давом этади. «Афсуски, ғалаба учун ватанпарварлик ва чидамкорликнинг ўзи камлик қилади, бизга моддий-техник таъминот керак. Луганск ҳимоячилари бошқа ҳудудларда бўлгани каби ўз вазифаларини қаҳрамонларча бажаришди. Биз албатта қайтамиз ва ғалаба қозонамиз!» деган украин ҳарбийлари.

Луганск области тўлиқ бой берилдими?

Украина қуролли кучлари Бош штаби баёнотидан ярим соат аввал Австралия бош вазири Энтони Албанизни қабул қилган Зеленский Россия Луганск области устидан тўлиқ назорат ўрнатиши мумкинлиги, аммо ҳар куни воқеалар ўзгараётгани, айрим аҳоли яшаш пунктлари қўлдан қўлга ўтаётганини айтганди.

Зеленскийнинг сўзларига кўра, Луганск области армиянинг «нозик жойи» бўлиб турибди, аммо қолган йўналишларга украиналиклар олдинга силжиган.

3 июл куни Россия Мудофаа вазирлиги Украинадаги Лисичанск шаҳри рус ҳарбийлари назоратига ўтганини эълон қилди. Вазирлик баёнотида айтилишича, Россия мудофаа вазири Сергей Шойгу 3 июл куни Украинанинг Луганск области таркибидаги Лисичанск шаҳри Россия армияси назоратига ўтгани ҳақида Россия президенти Путинга ҳисобот берган.

Баёнотда келтирилишича, россиялик ҳарбийлар Лисичанск атрофидаги Белогоровка, Новодружеск, Малорязанцова ва Белая Гора аҳоли яшаш пунктлари устидан тўлиқ назорат ўрнатган. Россия Мудофаа вазирлиги сўнгги бир кун давомида 182 квадрат километр ҳудудни «озод қилгани» ҳақида хабар берган.

Россия Украинага бостириб кирган кунларидан бошлаб фронт чизиғи Луганск областининг Украина назоратида қолган қисми маркази бўлган Северодонецк томон яқинлашганди. Луганск области раҳбари Сергей Гайдай Украина армияси мустаҳкамроқ мудофаа позициясини эгаллаш мақсадида бироз чекинганини айтганди. Аммо руслар май ойида Попасная шаҳрини босиб олгач, фронтдаги вазият кескин ўзгарган.

Икки ой давом этган кескин жанглардан кейин, июн ойи охирида руслар томонидан вайронага айлантирилган Северодонецк шаҳри Россия армияси назоратига ўтди. Энди эса Киев назоратида қолган иккинчи йирик шаҳар Лисичанск ҳам босиб олинди. Украинадаги манбаларнинг айтишича, мамлакат армияси Лисичанскдан вақтида чиқиб кетишга улгурган ва шу орқали шахсий таркибнинг ҳалок бўлиши ёки асир тушишидан сақланиб қолган.

Лисичанск ҳам бой берилгани инобатга олинса, Россия армияси Луганск областини тўлиқ босиб олган деб ҳисоблаш мумкин.

Янги мудофаа чизиғи

Бир неча кун муқаддам, украин ҳарбийлари Северодонецкдан чиқа бошлаганида, бу ҳақда дастлаб журналистлар хабар қилишган, Украина мудофаа вазирлиги эса чекиниш тўғрисидаги маълумотни барвақт эълон қилиш қўмондонлик режаларига зарар етказиши мумкинлиги ҳақида маълум қилганди.

Бу сафар Украина қуролли кучлари узоқ вақтгача чекиниш тўғрисида хабар бермади, лекин интернетда бундай маълумот шанба куниёқ тарқала бошлаганди.

Таҳлилчилар Лисичанскда украинлар мустаҳкамроқ мудофааланиши мумкинлигини тахмин қилганди.

Аммо Россия армияси кутилганидек Шимолий Дон дарёси бўйидаги шаҳарни Северодонецк орқали штурм қилмади-да (бу ҳолда дарёни кечиб ўтиш талаб этиларди), жануброқдаги ҳимоя чизиғини ёриб ўтди. Ўша ердан ҳужумга ўтган руслар Лисичанск ва Бахмут ўртасидаги коммуникация чизиғини кесиб қўйишди.

Натижада Украина армияси қуршовга тушмаслик учун Северск шаҳрига чекинди.

Эндиликда Россия армиясининг асосий босқин қиладиган шаҳарлари Донецк областидаги Словянск ва Краматорск бўлиши кутилмоқда.