Россиялик ретейлерлар Ўзбекистонда ишлаб чиқарилган маиший техникаларни сотишга ўтмоқда 

Россиядаги айрим ретейлерлар ўз ассортиментини Ўзбекистондаги ишлаб чиқарувчиларнинг маҳсулотлари билан кенгайтиришга ўтмоқда, деб хабар берди «Коммерсант». 

Хабарга кўра, «М.Видео-Эльдорадо» Artel компанияси билан келишувга эришган. 

Июл ва август ойларида совуткич, музлаткич, кир ювиш машиналари, телевизорлар, ошхона плиталари, чангюткич ва кондиционерларнинг дастлабки партияси ретейлерга етказиб берилади. 

Holodilnik.ru компанияси тижорат директори Алексей Погудаловнинг фикрича, Ўзбекистон компанияси икки йил ичида кўплаб рақобатчиларни сиқиб чиқариб, Россия маиший техника бозорининг 5 фоизини эгаллаши мумкин. Бунинг учун тўғри стратегия танланиши лозим, дейди у. 

5 июл куни Россия савдо ва саноат вазири Денис Мантуров мамлакат компанияларига параллел импортга рухсат берилишини айтганди.