Самарқандда боғча мудираси методистнинг бошини кружка билан уриб ёрди

Ҳолат юзасидан жиноят иши қўзғатилган.

Ижтимоий тармоқларда Қўшработ туманидаги мактабгача таълим муассасаларидан бирида ходимлар бир-бирини "кружка" билан уриб, бошини ёргани ҳақида видео тарқалди. Самарқанд вилояти ИИБ ҳолат бўйича расмий маълумот берди.

Қайд этилишича, 2022 йилнинг 1 июль куни Қўшработ туманидаги мактабгача таълим муассасаларидан бирининг мудираси Ч.А. ҳамда шу муассаса методисти Э.Г. ўртасидаги келишмовчилик натижасида жанжал юзага келган.

Вилоят ИИБ ахборотида айтилишича, ўзаро жанжал давомида Ч.А. Э.Г.нинг боши қисмига бокал билан уриб, тан жароҳати етказган.

Мазкур ҳолат юзасидан 2 июль куни Қўшработ тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 109-моддаси 2-қисми билан жиноят иши қўзғатилган.

Расмий хабар матнига кўра, ҳозирги вақтда тергов ҳаракатлари олиб борилмоқда.

#боғча #Қўшработ