Миллий гвардия спорт курашлари бўйича мактаби «Динамо» жамияти таркибига ўтказилади

Президентнинг “Миллий гвардия спорт курашлари бўйича ихтисослаштирилган олимпия захиралари мактаби фаолиятини янада такомиллаштириш тўғрисида”ги қарори лойиҳаси эълон қилинди.

Миллий гвардиянинг спорт курашлари бўйича ихтисослаштирилган олимпия захиралари мактабини “Динамо” жисмоний тарбия-спорт жамияти таркибига ўтказиш тўғрисидаги таклифига розилик берилади.

Миллий гвардия қўмондонига “Динамо” жисмоний тарбия-спорт жамияти тузилмасига умумий штат сони доирасида ўзгартиришлар киритиш ҳуқуқи берилади.

Белгилаб қўйилишича:

• спорт курашлари бўйича ихтисослаштирилган олимпия захиралари мактаби Миллий гвардия “Динамо” жисмоний тарбия-спорт жамияти ҳузуридаги спорт комплексига тегишли бинолар ва иншоотлар бир қисми негизида белгиланган тартибда бепул ижара асосида (коммунал хизматлари бундан мустасно) эркин ва юнон-рум кураши бўйича ёш истеъдодли курашчиларни танлаб олиш ва тайёрлаш билан шуғулланадиган олий спорт натижаларига йўналтирилган муассаса сифатида фаолият юритади;
• спортчилар турар жой, тўрт маҳал овқат, спорт экипировкаси, махсус кийим-бош, спорт ускуналари ва анжомлари билан таъминланади;
• спорт мактаби ўз фаолиятини Вазирлар Маҳкамасининг “Спорт мактаблари фаолиятини ҳамда спорт мактаблари тренерлари ва мутахассислари меҳнатини моддий рағбатлантириш тизимини янада такомиллаштириш тўғрисида”ги қарори асосида ташкил этади;
• спорт мактабида ўқувчи-спортчилар контингенти, уларнинг вазн тоифаларини ҳисобга олган ҳолда, 60 нафардан иборат этиб белгиланади ҳамда таълим олиш муддати спортчи Ўзбекистон терма жамоаси асосий (ёки захира) таркибида бўлган давр мобайнида давом этади;
• спортчи лавозимга спорт мактаби ўқувчи-спортчилар контингенти орасидан қабул қилинади;
• спорт мактабига ўқувчи-спортчиларни қабул қилиш умумий контингентидан келиб чиққан ҳолда йил давомида амалга ошириб борилади;
• спорт мактабида ўқув-машқ жараёнининг давомийлиги ва даврийлиги спорт мусобақалари тақвими ҳамда ўқувчи-спортчилар ҳар бир гуруҳи учун якка тартибда спорт тайёргарлиги даври ҳисобга олинган ҳолда спорт мактаби раҳбарияти томонидан белгиланади.