“Ўзбекнефтгаз” АЖ соҳа учун зарур маҳсулотларни аввало, маҳаллий тадбиркорлардан харид қилмоқчи

 “Ўзбекнефтгаз” акциядорлик жамияти томонидан Шўртан газ-кимё мажмуасида маҳаллий ишлаб чиқарувчилар, журналист ва блогерлар иштирокида 2022-2023 йиллар учун маҳсулот ва хизматлар эҳтиёжи тақдимоти ўтказилди.

Айтиш жоиз, Президент Шавкат Мирзиёев раҳбарлигида жорий йилнинг 11 март куни ўтказилган йиғилиш давомида берилган топшириқлар асосида “Ўзбекнефтгаз” АЖ тизимида маҳаллийлаштириш, импортни қисқартириш ҳамда саноат кооперацияси алоқаларини кенгайтириш йўналишида янгича тартибда ишлар ташкил этилмоқда.

Бошқарув раиси Меҳриддин Абдуллаевнинг ташаббуси билан илк марта етакчи маҳаллий ишлаб чиқарувчилар, журналист ва блогерлар иштирокида “Ўзбекнефтгаз” АЖ корхоналарининг 2022-2023 йиллар учун маҳсулотлар, бутловчи буюм ва материаллар ҳамда хизматларга бўлган эҳтиёжлари тақдимот қилинди.

Дарвоқе, бир муддат олдин Меҳриддин Абдуллаев ўзи раҳбарлик қилиб келаётган тизимнинг ҳамма учун очиқ бўлишига ҳаракат қилаётганини билдириб, “битта мих харид қилсак ҳам очиқ бўлсин, халқ кўриб турсин”, деганди.

Тармоқ флагмани бўлган Шўртан газ-кимё мажмуасида ўтказилган мазкур тадбирга 150 дан ортиқ маҳаллий ишлаб чиқариш корхоналари вакиллари, 20 дан ортиқ журналист ва блогерлар таклиф этилди.

Тадбирда дастлаб "Ўзбекнефтгаз" АЖнинг 2022 йил учун товарларга бўлган эҳтиёжлари тўғрисида маълумот берилди. Жорий йилда тизим корхоналари томонидан 1,9 трлн сўмлик маҳсулотлар хариди амалга оширилиши кўзда тутилган бўлиб (хизматлардан ташқари), шундан 520 млрд сўм – жорий таъмирлаш ишлари, 54,2 млрд сўм – қудуқларни таъмирлаш, 619 млрд сўм – бурғилаш ишлари, 742 млрд сўм излов қидирув ишлари доирасида йўналтирилади.

2023 йил учун 2,27 трлн сўмлик товар моддий бойликлари хариди учун бошланғич эҳтиёж шакллантирилганлиги ва якуний эҳтиёжлар рўйхати қонунчиликда белгиланган тартибда махсус электрон порталларга жойлаштирилиши маълум қилинди.

Таъкидлаш жоизки, сўнгги йилларда тизим корхоналари харидларида маҳаллий корхоналар улушини босқичма-босқич кенгайтириб бориш бўйича амалий ишлар олиб бориляпти. Натижада, тармоқнинг умумий харидлари ҳажмида маҳаллий маҳсулот ва хизматлар улуши 2018 йилдаги 17 фоиздан 2021 йилда 28 фоизгача ортди.

Сўнгги уч йилда жами 450 га яқин турдаги янги маҳсулотлар ўзлаштирилди.

Тадбиркорлар билан доимий алоқани йўлга қўйиш мақсадида, маҳаллий корхоналар орасида илк марта тармоқ виртуал кўргазмаси (ung-cooperation.uz) янгича дизайнда ташкил этилди. Унда мавжуд маҳсулотлар бўйича барча зарур маълумотлар қайта янгиланди. Хусусан, 4 минг турдан ортиқ маҳсулотнинг тўлиқ техник топшириқномалари порталга жойлаштирилди.

Тизимли равишда маҳаллий ишлаб чиқарувчилар вакилларини “Ўзбекнефтгаз” АЖ корхоналарига ташрифлари амалга оширилмоқда. Хусусан, 28 февраль куни “Uzbekiston GTL” заводига, 2 июнь куни Бухоро НҚИЗга ана шундай ташрифлар уюштирилди.

Ўтган йили ишга туширилган “Uzbekiston GTL” заводи эҳтиёжлари учун маҳсулот ва хизматларни маҳаллийлаштириш доирасида биринчи ярим йилликда 21 та ҳамкорлик меморандумлари имзоланди. Айни пайтга келиб, мазкур меморандумлар ижроси доирасида қиймати 74,5 млрд сўмлик 59 та шартномалар имзоланиб, ижрога қаратилди.

Шўртан ГКМда илк бор ташкил этилган бугунги тақдимотда заводнинг бевосита механика-таъмирлаш цехида алоҳида “шоу-рум" ташкил этилди. Унда тизим корхоналари учун зарур бўладиган 50 га яқин турдаги товар гуруҳига мансуб бўлган жами 2500 дан ортиқ турдаги моддий-техник ресурслар намойиш этилди. Хусусан, импортда сезиларли улушга эга бўлган кенг ассортиментдаги қувурлар, кимёвий реагентлар, назорат-ўлчов буюмлари, метрология ускуналари бўйича ҳам алоҳида муҳокамалар ташкил этилди.

“Тармоқ ва маҳаллий ишлаб чиқарувчи” форматида ўтказилган учрашувда “Бухоро НҚИЗ” МЧЖ, “Шўртан ГКМ” МЧЖ, “Узкоргазкемикал” МЧЖ ҚК, “Ўзбекнефтгаз бурғилаш ишлари” МЧЖ каби корхоналарнинг, шунингдек тизимдаги барча нефть-газ қазиб чиқариш бошқармаларининг ҳам товар моддий бойликларига эҳтиёжи бўйича алоҳида тақдимотлари ўтказилди.

Бунда дастлабки ҳисоб-китоблар бўйича 2023 йил учун “Бухоро НҚИЗ” МЧЖ томонидан 645 млрд сўм, “Ўзкоргазкемикал” МЧЖ ҚК томонидан 438 млрд сўм, “Шўртан ГКМ” МЧЖ томонидан 402 млрд сўм, “Ўзбекнефтгаз бурғилаш ишлари” МЧЖ томонидан 150 млрд сўмлик маҳсулот ва буюмлар харид қилиниши режалаштирилгани маълум қилинди.

Шўртан ГКМ ҳудудида “Ўзбекнефтгаз” АЖ билан кооперация ҳамкорлигини ўрнатиш истагида бўлган Чирчиқ шаҳрида рўйхатдан ўтган “Cold fire” МЧЖ томонидан маҳаллийлаштирилган ёнғин ўчириш асбоблари учун фойдаланиладиган кимёвий реагентлар намойиши ҳам ўтказилди.

Журналист Исомиддин Пўлатов
Оператор ва монтаж устаси Фахриддин Ҳотамов