Қаршидаги каналдан жасади топилган йигит воқеаси: марҳумнинг яқинлари бу табиий ўлим бўлганига ишонмаяпти

Марҳумнинг акаси Дилшод Каримов Kun.uz мухбири билан суҳбатда терговга қадар суриштирув ҳаракатлари суст кетаётгани, суд-тиббий экспертиза хулосаси чўзилаётганини маълум қилди.

Дилшод Каримовнинг айтишича, укаси Исломни 11 июл куни 23:00 лар атрофида Асад исмли таниши телефон орқали чақиради. Асад ўзи ишлаётган корхонада ҳамкасблари билан тортишиб қолганини айтади. Ислом ўша жойга таниш ҳайдовчи билан етиб борганида, уларни бир гуруҳ йигитлар кутиб турган бўлади. Муштлашув юзага келади. Бу орада Исломни олиб борган ҳайдовчи ҳам, уни чақирган Асад ҳам воқеа жойидан қочади. Исломнинг ўзи калтаклар остида қолади – ўша куни оқшом у уйга қайтмайди.

Эртаси куни йигит сувга чўкиб кетган бўлиши мумкин, деган гумон билан фавқулодда вазиятлар ходимлари, ҳуқуқ-тартибот идоралари воқеа жойини кўздан кечиради. Ғаввослар жалб қилинади, бироқ натижа бўлмайди.

Ислом воқеадан уч кун ўтиб, 14 июл куни Қарши магистрал каналининг қуйироқ қисмидан ўлик ҳолда топилади.  

Дилшод Каримов ўша куни укаси калтакланганига бевосита гувоҳ бўлганлар борлигини айтади. Бироқ у марҳумнинг яқинлари, гувоҳлар жиддий сўроқ қилинмаётганидан таажжубланмоқда. 25 кундан ортиқ вақт ўтса-да, экспертиза хулосалари чиқмаётгани, укасини урган йигитларга нисбатан ҳеч қандай чора қўлланмаётгани унинг кўнглига шубҳа солмоқда. «Ишни бости-бости қилиб юборишларидан қўрқаман», дейди ака.

Исломнинг онаси Сабоҳат Хидирова билан ҳам суҳбатлашдик. Она фарзандининг содда ва бошқаларга доим ҳамдардлик ҳисси билан яшаганини айтмоқда. Аёл шу кунларда кенжа ўғлига келин олмоқчи бўлиб юргани, бироқ доғда қолганини йиғлаб айтиб берди.

Биз асосий гувоҳ – 11 июл кечаси Исломни чақирган таниши Асад билан у калтакланган жойда суҳбатлашдик. Асаднинг айтишича, ўша куни ўзи ишлаётган корхонадаги йигитлар билан зиддиятга бориб қолади. Натижада ўзи акасидек кўриб юрган Исломни ёрдамга чақиради.

Асад Ислом каналдан топилган кунда, воқеанинг иссиғида у билан прокуратура ва ИИБ вакиллари умумий тарзда бир марта суҳбатлашганини билдирди. Бироқ уни орган ходимлари қайтиб чақирмаган.

«Ислом акани охирги марта кўрганимда, уни тепишаётганди, бир неча киши бўлиб унга ёпишишди», дейди Асад.

Ислом Каримов болалигидан спорт билан мустақил шуғулланиб келган. Унинг оила аъзолари айнан Қарши магистрал каналида чўмилиб катта бўлганини айтмоқда. Шу сабабли калтакланиб ожиз ҳолатга келтирилмаган ёки аввал ўлдирилиб, сувга ташлаб юборилмаган бўлса, у асло чўкиб кетмаслигига ишонишмоқда.

Марҳумнинг акаси Дилшод Каримов кўз ўнгимизда ўзини каналга ташлади. У нариги қирғоққа сузиб ўтиб, нафас ростламасдан яна ортга қайтди. Шу ҳаракати орқали ўзидан жисмонан бақувват бўлган укаси учун каналдан сузиб чиқиш муаммо бўлмаслигини исботлашга уринди.

Биз марҳумнинг яқинлари билдирган эътирозга асосан Қашқадарё вилоят прокуратурасидан изоҳ олмоқчи бўлдик. Вилоят прокуратураси ахборот хизмати раҳбари Соҳибжон Ғайбуллаев биз билан суҳбатда терговга қадар текширув ҳаракатлари олиб борилаётгани, экспертиза хулосаси кутилаётганини маълум қилди. Масъул бундан ортиқ маълумот қўшимча қила олмаслигини билдирди.

Исомиддин Пўлатов, Kun.uz мухбири.

Тасвирчи ва монтаж устаси: Фахриддин Ҳотамов.