«Челси» сотди ва сотиб олди. Европада сўнгги ҳафтада яна ўнлаб трансферлар

Немислар клуби бош мураббийи Оливер Гласнер футболчининг кетишидан хафа бўлганини яширмади: «Кўзларимда ёш. Костич биз учун жуда қадрли эди ва унинг кетиши бизни ранжитмай қўймайди. Мен унга «Айнтрахт»ни тарк этишни истаса, бу ишни қаҳрамонлардек қилиши кераклигини айтгандим. Ўйлайманки, у буни уддалади, чунки у Европа Лигасининг ўтган мавсумидаги энг яхши футболчилардан бири бўлди».

Лукас Торрейра: «Арсенал» → «Галатасарой» (6 млн евро)

Ушбу уругвайлик яримҳимоячи 2018 йилдан буён «Арсенал» аъзоси, аммо сўнгги икки мавсумда ижарага берилди («Атлетико», «Фиорентина»). «Галатасарой» эса 26 ёшли футболчи учун 6 млн евро тўлади ва у билан тўрт йиллик шартнома имзолади. Ўтган мавсумда Торрейра Италия чемпионатида бешта гол урган, бу эса таянч яримҳимоячи позициясидаги футболчи учун жуда яхши натижа.

«Галатасарой» бу ёзда бир қатор яхши харидларни амалга оширди, чунки жамоа ўтган мавсумдаги муваффақиятсизликдан кейин яна элита сафига қайтиши керак.

Антони Модест: «Кёльн» → «Боруссия» Д (5,1 млн евро)

Себастьен Аллернинг касаллиги ҳақида маълум бўлгач, «Боруссия» янги форвард қидиришга тушди. Дортмундликлар қиммат бўлмаган вариантни афзал кўришди ва 34 ёшли Модестни сафга қўшиб олишди.

Француз футболчиси Германияда катта тажрибага эга («Ҳоффенҳайм» ва «Кёльн» учун 200 дан ортиқ ўйин ўтказган) ҳамда ўтган мавсумда ҳам яхши статистика қайд этган. Ўшанда Антони 35 ўйинда рақиблар дарвозасини 23 бор ишғол этиб, яна тўрт голга ҳаммуаллифлик қилганди. Футболчи билан бир йиллик шартнома имзоланган, Аллер реабилитация жараёнидан ўтиб кейинги мавсумга сафга қайтиши кўзда тутилган.

Жоржиньо Вейналдум: «ПСЖ» → «Рома» (ижара)

Нидерландиялик футболчи янги мавсумни Италияда ўтказади. Агар футболчи ўйинларнинг ярмида майдонга тушса ва клуб у билан ЕЧЛга йўлланма олса, «Рома» унинг трансфер ҳуқуқини сотиб олади. Журналист Скиранинг маълумотига кўра, парижликлар Вейналдумнинг маошининг 40 фоиз қисмини тўлашда давом этади.

Италия чемпионатида юқори ўринлардан бирини эгаллашни мақсад қилган «Рома» учун ёмон трансфер эмас. Вейналдумнинг ўзи Римга келгач, бу клубга ўтишдан олдин Муҳаммад Салоҳ ва Кевин Стротман билан гаплашгани ва улар римликлар клуби ҳақида жуда кўп яхши фикрлар билдиришганини айтди.

Иско: «Реал» → «Севилья» (эркин агент)

Испаниялик «Реал»да қарийб 10 йилини ўтказди, 200 дан ортиқ ўйинда майдонга тушди ва эркин агент мақомида кетди. Ўтган мавсумда ушбу яримҳимоячи майдонда атиги 407 ўтказган (ЕЧЛ ўйинларида бирор марта ўйнамаган), шу туфайли унинг мадридликлар сафини тарк этиши муқаррар бўлиб қолганди.

«Севилья»га ўтгач, футболчи ушбу клубнинг ўйин услуби ўзига жуда маъқул эканини айтди. Шунингдек, ўз даражасини намоён этиш мақсадида келганини билдирди. Қайд этиш керакки, Иско бутун фаолияти давомида фақат ўз ватани чемпионатида ўйнамоқда.

Дрис Мертенс: «Наполи» → «Галатасарой» (эркин агент)

Бельгиялик футболчи Италияда ўтган тўққиз йилдан (қарийб 400 ўйин) кейин «Наполи»ни тарк этди. Мертенс Неаполда туғилган ўғлини тиззасига ўтирғизган ҳолда видеоролик ёзди. Дрис Италия жанубидаги уйини сотмоқчи эмаслигини айтди ва «Наполи» мухлислари билан вақтинча хайрлашди.

Шундан кейин футболчи «Галатасарой» билан бир йиллик шартнома имзолади. Ўтган мавсумда Дрис А Сериянинг 30 ўйинида 11 гол урганди, унинг янги клуби эса Туркия чемпионатида жуда ёмон мавсум ўтказган (13-ўрин).

Алексис Санчес: «Интер» → «Марсел» (эркин агент)

«Интер» ёзги трансферлар ойнаси давомида маошлар ведомостини қисқартириш устида фаол иш олиб борди. Асосий муаммо Артуро Видал ва Алексис Санчеснинг шартномаларида эди. Якунда миланликлар клуби икки чилилик футболчи билан хайрлашди. Видал аввалроқ Бразилияга йўл олганди, Санчес эса шу кунларда француз чемпионатига ўтди. Алексис А Сериянинг ўтган мавсумида майдонда атиги 793 дақиқа ўтказди, «Марсел»да у кўпроқ имконият берилишидан умид қилмоқда. Французлар клуби фанатлари ушбу трансферни жуда яхши қаршилашди ва янги футболчини кутиб олиш учун кўчаларни тўлдиришди.

Алексей Миранчук: «Аталанта» → «Торино» (ижара)

Россиялик яримҳимоячи ниҳоят клубини ўзгартирди ва топ-чемпионатда қолди. «Торино» Миранчукни мавсум якунига қадар ижарага олди, туринликлар уни 12 млн еврога трансфер қилиш ҳуқуқига эга. Клублар ўртасидаги музокаралар осон кечмади, аммо якунда Алексей барибир «Аталанта»ни тарк этди. «Торино» бош мураббийи Иван Юрич россиялик футболчи Жан Пьеро Гасперини қўл остида ўйнаганини юқори баҳолади. Хорватиялик мутахассиснинг сўзларига кўра, Миранчукка мослашиш учун кўп вақт кетмайди ва у бошланғич таркибга кириши мумкин. Алексейнинг агенти Вадим Шпинёв «Чемпионат» билан суҳбатда «Аталанта» раҳбарияти бу келишувга фақат футболчига ҳурмат юзасидан рози бўлганини айтди. Имиж ва молиявий жиҳатдан бергамоликлар учун бу фойдасиз трансфер бўлган.

Никола Влашич: «Вест Ҳэм» → «Торино» (ижара)

РПЛ чемпионатида тўп сурган яна бир футболчи туринликлар клубида пайдо бўлди. Влашичнинг «Вест Ҳэм»даги ишлари юришмади (31 ўйин, бир гол, икки голли узатма), ва энди унда фаолиятини қайта жонлантириш имконияти пайдо бўлди.

Журналист Николо Скиранинг маълумотига кўра, хорватиялик яримҳимоячи янги клубига ўтиш учун шартномаси камайишига рози бўлган. Миранчук шартнома имзолашидан бир кун олдин Влашич билан учрашган. Шпинёвнинг сўзларига кўра, футболчилар бир-бири билан илиқ саломлашган ва рус тилида гаплашишган: «Никола жуда мамнун эди, йигитлар бир-бирини жуда яхши қаршилади, қучоқлашишди, ахир Никола русчада жуда яхши гаплаша олади. Улар кўришганларидан жуда хурсанд эди».

Бошқа трансферлар:

• Беньямин Шешко: «Зальцбург» → «РБ Лейпциг» (24 млн евро, шартнома 2023/2024 йилги мавсумдан кучга киради);
• Андреа Пинамонти: «Интер» → «Сассуоло» (20 млн евро);
• Исса Диоп: «Вест Ҳэм» → «Фулҳэм» (17,8 млн евро);
• Миккель Дамсгор: «Сампдория» → «Брентфорд» (15 млн евро);
• Иван Проведель: «Специя» → «Лацио» (2 млн евро);
• Даниэль Васс: «Атлетико → «Брондбю» (1,75 млн евро);
• Анхелиньо: «РБ Лейпциг» → «Ҳоффенҳайм» (ижара);
• Исмаили: «Шахтёр» → «Лилль» (эркин агент);
• Марлон: «Шахтёр» → «Монца» (ижара);
• Нето: «Барселона» → «Борнмут» (эркин агент);
• Конор Коуди: «Вулверҳэмптон» → «Эвертон» (ижара);
• Маланг Сарр: «Челси» → «Монако» (ижара);
• Пабло Мари: «Арсенал» → «Монца» (ижара);
• Антонио Кандрева: «Сампдория» → «Салернитана» (ижара);
• Сальваторе Сиригу: «Женоа» → «Наполи» (эркин агент).