Ўтган мавсумда «Арсенал»га яққол тўпурар футболчи етишмаганди, аммо Габриэл Жезуснинг келиши Микел Артета жамоасини янги даражага олиб чиқди. Мавсумолди йиғинидаги ўртоқлик учрашувларида ҳам голларни қалаштирган бразилиялик футболчи «Эмирейтс»даги илк расмий ўйинидаёқ «канонирлар» жамоаси мухлисларининг янги кумирига айланди. Ҳисобни очувчи голни уришда у тўпни дарвозанинг узоқ «тўққизлиги»га жойлаб қўйди. Кейин бу шедеврга одатий гол қўшилди — узоқ устун олдида тўп учун курашда бош билан аниқ ҳаракат қилди. У танаффусга қадар ҳет-трик расмийлаштириши ҳам мумкин эди, Жезус ўз таъқибчисини ортда қолдириб, дарвозабон билан яккама-якка вазиятга чиқиб борди. Аммо Уорд ақл бовар қилмас ҳаракат билан тўпни тўхтатди ва интригани сақлаб қолди, бундан олдинроқ Салиба аҳмоқона автоголи билан ҳисоб қисқаришига сабабчи бўлганди.
Аммо якунда уэлслик дарвозабон «Лестер»нинг ўйинни қутқариш имконини йўққа чиқарди, у осон вазиятда тўпни қўлида тутиб қололмади ва Чакага гол совға қилди. Уордга Рамсдейл муносиб далда берди ва Мэддисоннинг ўткир бурчакдан йўллаган зарбасини оёқлари орасидан ўтказиб юборди, аммо кўп ўтмай Габриэл Мартинелли жарима майдони ташқарисидан йўллаган зарбаси билан ўйиндаги якуний ҳисобни ўрнатди. Чака билан бўлган вазиятдаги каби унга ҳам феноменал ўйин кўрсатаётган Жезус ассистентлик қилди.
Ҳоланд тўпга саккиз бор тегинди, «Сити» биринчи ўринда
Ўтган турда Ҳоланд дубл расмийлаштирганди. Энди эса ассист муаллифи бўлди. Кўринишидан арзимасдек, аммо у буни маҳорат билан ижро этди! Норвегиялик Гундўғаннинг узатмасини уч ҳимоячи орасида туриб қабул қилиб олди ва кучли босим остидалигига қарамай йиқилаётган ҳолда тўпни дарвозабон билан бирга-бир чиқиб бораётган шеригига қайтариб берди.
Бу эпизод — Ҳоланд жамоадошлари ва Хосеп Гвардиоланинг принципларини нақадар яхши тушунаётгани ифодаси бўлди. Лекин ҳозирча унинг ўйинга қўшилиб кетиш даражаси у қадар юқори эмас. 74 дақиқада тўпга саккиз бор тегиниш ва икки узатма бериш — жуда кам. Аммо «Сити»да натижани таъминлаши мумкин бўлган футболчилар етарлича. Масалан, де Брюйне «шведка» зарбаси билан ҳисобни оширди, кўп ўтмай Фоденга голли узатма берди. Белгиялик футболчи сўнгги ўн беш уй учрашувидан фақат биттасини голли ҳаракатсиз якунлаган, «шаҳарликлар» эса чемпионлик графиги бўйича кетмоқда.
Мавзуга оид
«МЮ» «қатл этилди»
Криштиану Роналду бошланғич таркибда — бу ўйин бошланишидаги асосий эътиборли ҳолат эди. Аммо шу куни диққат марказида де Хеа бўлди, аммо испаниялик посбон бу сафар қутқармади, аксинча «МЮ» дарвозасига икки гол «олиб келди». Аввалига Дасилванинг у қадар кучли бўлмаган ва ўз қўлига келган зарбасини ўтказиб юборди, кейин эса тўпни дарвозадан узоқлаштиришда хатога йўл қўйди, Йенсен эса фаолиятидаги энг оддий голларидан бирини урди.
«Брентфорд» шу куни истаганини қилди ва 35-дақиқага келиб таблода 4:0 ҳисоби порлай бошлади. Лекин шу куни чап ёнбоши билан уйғонган биргина де Хеа эмасди. Стандарт вазиятдан учинчи гол урилганида Лисандро Мартинес қўпол хатога йўл қўйди, кейин эса Мбеумо муаллифлигидаги тўртинчи гол дарвозадан жой олди — мезбонлар қарши ҳужумга чиққанида «қизил иблислар» ҳимоячилари улгурмади.
Кристиан Эриксен «Брентфорд»га сафари бундай бўлишини кутмагани аниқ, биринчидан, мезбон жамоа мухлислари «МЮ»ни танлагани учун тўп унга келиши биланоқ қаттиқ ҳуштакбозлик қилаверишди, фақат тўртинчи голдан кейин бас қилишди, балки ачинишганидан. Айнан даниялик футболчи жавоб голи уришга яқин келди, аммо бу гол бўлганида ҳам ҳеч нарса ўзгармасди. Худди Роналдунинг зарбаси дарвоза тўсини устидан эмас, остидан ўзгарганида ҳам натижага жиддий таъсир қилиши даргумон бўлганидек. Эрик тен Ҳагда муаммолар: «МЮ» 30 йил ичида илк бор турни турнир жадвалининг сўнгги ўринида якунлади, бир ҳафтадан кейин жамоани «Ливерпул»га қарши ўйин кутмоқда.
Дарвоқе, бу тур ўйинини энди ўтказадиган «Ливерпул» «Кристал Пэлас»ни ўта йирик ҳисобда мағлубиятга учрата олса, «МЮ»ни сўнгги ўриндан юқорига олиб чиқиши мумкин.
Инглиз матбуотига кўра, бу шармандали натижадан кейин Эрик тен Ҳаг футболчиларни жазолашга қарор қилган. BBC журналисти Саймон Стоунга кўра, «Манчестер Юнайтед» устози дастлаб режалаштирилган дам олиш кунини бекор қилди.
Sky Sports инсайдери Каве Солеҳолга кўра, тен Ҳаг футболчиларга 13,8 км кросс югуриш вазифасини бермоқчи бўлди. Бу масофа рамзий маънога эга эди. «Брентфорд» ва «Манчестер Юнайтед» футболчиларининг ўйин давомида югуриб ўтган масофаси орасидаги фарқ шундай эди: 109,4 км - 95,6 км. Қайд этиш жоиз: тен Ҳаг ҳақиқатан ҳам бу ишни қилганми ёки йўқми номаълум. Ёки, масалан, шунчаки таҳдид сифатида айтган бўлиши ҳам мумкин. Чунки, ўйиндан кейинги кун, айниқса, 90 дақиқа ўйнаган футболчилар бундай масофага чопишга мажбур этилса, маълум вақтга сафдан чиқиб қолиши ҳам мумкин.
Лекин тен Ҳаг бу натижадан қаттиқ дарғазаб бўлгани аниқ. «Сизлар клубнинг барча ходимларини хафа қилдингиз. «Юнайтед»да ўйнаган футболчи ғишт деворни ёриб ўтиши керак, бу ҳатто муҳокама қилинмайди. Афтидан жуда кўп футболчилар бу клубда ўйнашдан қўрқаётганга ўхшайди», деган мураббий ўйиндан кейин кийим алмаштириш хонасида.
Тухел ва Конте муштлашиб кетаёзди, уларга қизил кўрсатилди
Якшанба куни Европа футболидаги асосий ўйин ишончларни оқлади. Бу мавсумга жиддий тайёрланган Антонио Конте жамоаси муҳим синовдан ўтди. «Тоттенҳэм» ўйинни жуда тетик бошлади, аммо «Челси» кўп ўтмай ташаббусни қўлига олди. Ллорис Ҳаверц ҳисобни очишига йўл қўймади, аммо Кукуреля бурчакдан тўпни узатиб берганида Кулибали тўпни тўхтатмасдан аниқ ва кучли зарба билан дарвоза тўрига жойлади.
Кўклар ҳимояда ҳам кўп тер тўкишига тўғри келди. Биринчи бўлимда Менди Сессеньон билан яккама-якка вазиятда ўзини кўрсатишига тўғри келди. Кейинроқ Кейн ўзига узатилган пасга аниқ зарба бера олмасдан меҳмонларни кечирди. Бу гапни Стерлинг иштирокидаги эпизод бўйича ҳам айтиш мумкин. У жарима майдони ичида ҳимоячиларни доғда қолдирди, аммо тўпни дарвоза тўсини устидан юқорилатиб тепди.
Шундан кейин ўйинда вазиятлардан фойдалана олмаслик борасида бурилиш рўй берди ва Ҳейбергнинг узоқ масофадан йўллаган кучли зарбаси «Тоттенҳэм»га мувозанатни тиклаш имконини берди. Бу голга жарима майдони ичида дриблинг қилишга уринган Жоржиньонинг тўп йўқотиши сабаб бўлди - бу вазиятда тўп учун курашда Ҳаверц қўполлик ишлатган бўлиши ҳам мумкин. Аммо VAR бунинг учун «Тоттенҳэм»нинг голини бекор қилмасди, чунки ҳодиса Менди қўриқлаётган дарвозадан олисроқда ва голгача 44 сония олдин рўй берди (ва «Челси» ундан кейин маълум вақт тўпга эгалик ҳам қилди).
Лекин мезбонларда тўп тепилган вақтда унинг йўлида турган Ришарлисон офсайдда қолгани саволлар туғдирди - у дарвозабонга тўпни кўришда халал берган бўлиши мумкин.
Аммо гол ҳисобга олинди, Конте эса уни жазавага тушиб нишонлади ва ҳакамга эътироз билдириш учун келаётган Томас Тухел билан тўқнашиб кетди, бу эса мураббийлар можаросини келтириб чиқарди.
Жеймс «Челси»га ҳисобдаги устунликни қайтарган чоғда германиялик мураббий реванш олишга қарор қилди ва голни «шпорлар» захира ўриндиғи атрофига югуриб бориб нишонлади. Бу гол кўклар жамоасига хос тарзда урилди — Канте тўпни эгаллаб олди ва ўнг қанот ҳимоячиси Стерлингнинг пасига очилди. Кўкларнинг ўнг қаноти рақибни ҳоли жонига қўймади, Жеймснинг голидан олдинроқ ҳам унинг узатмасидан кейин Ҳаверц жуда қулай вазиятни йўққа чиқарганди.
Аммо кўкларнинг ғалабаси нақддек кўринганида Кейн бурчакдан тўп узатилган вазиятда «Тоттенҳэм»ни қутқарди. Ўйинга қўшиб берилган олтинчи дақиқада у АПЛда бир жамоа учун 184-голини уриб, Серхио Агуэронинг рекордини такрорлади. Яна бир аниқ зарбадан кейин ушбу форвард Лондон дербиларининг энг яхши тўпурари Тьерри Анрини қувиб етади (43 гол). Бу голдан кейин ҳам «Челси» футболчилари эътироз билдириб, ҳакам Ромеронинг Кукуреляга нисбатан фолига эътибор қаратмаганини айтишди - бурчакдан тўп узатилаётган вазиятда «Тоттенҳэм» ҳимоячиси рақибнинг сочидан тортиб, уни газонга йиқитганди.
Шундай экан, финал ҳуштаги чалиниши билан ҳеч нарса тугаб қолмади. Анъанавий қўл ташлаш жараёнида Тухел Контенинг қўлини маҳкам ушлаб тураверди ва ўзининг кўзига қарашни талаб қилди. Натижада — мураббийларнинг навбатдаги зиддияти ва унга футболчилар ҳам аралашди. Мураббийларнинг муносабати дербини янада қайноқ қилди.
«Мен буни икки футболчи ўртасидаги келишмовчиликка қиёслайман, улар бироз жанжаллашган, лекин ҳеч нарса бўлмаган ва ҳеч ким жабрланмаган. Бу — Премьер-лига, иккала мураббий ҳам ўз жамоалари учун курашди. Ҳаммаси шу, катта гап эмас. Зиддият бу ўйиннинг бир қисми эди», деди ўйиндан кейин Тухел.
