Европа иттифоқи кенгаши Украина собиқ президенти Виктор Янукович ва унинг ўғли Александрга, шунингдек, Украина собиқ бош прокурори Виктор Пшонка ва унинг ўғли Артёмга нисбатан 2014 йилда давлат маблағларини олиб чиқиб кетиш ва ўзлаштириш бўйича қўйилган санкцияларни узайтирмади. Бу ҳақда 12 сентябр, душанба куни Европа иттифоқининг расмий журналида маълум қилинди.
2014 йилнинг март ойида ЕИ Янукович, Пшонка ва уларнинг ўғилларига «Украинада давлат маблағларини ўғирлаш ва уларни мамлакат ташқарисига ноқонуний олиб чиқиб кетиш билан боғлиқ жиноятлар учун жиноий жавобгарликка тортиладиган шахслар» сифатида жазо чораларини жорий қилди.
Санкциялар муддати 2022 йил 6 сентябрда тугади ва расмий Брюссел бу чораларни узайтирмасликка қарор қилди.
Шу билан бирга, Виктор Янукович ва унинг ўғли ҳамон ЕИ санкциялари остида қолмоқда – 2022 йил август ойида уларга нисбатан «Украина ҳудудий яхлитлиги, суверенитети, мустақиллиги ва барқарорлигига путур етказиш ёки унга таҳдид солишдаги роли учун» чеклов чоралари жорий этилган. Александр Януковичга нисбатан эса «Украинанинг Донбасс минтақасидаги сепаратистик гуруҳлар билан битимлар олиб бориши учун» санкциялар киритилган.
Янукович ва унинг ўғли бир неча бор Европа судларида санкцияларни олиб ташлашга эришган. Бундай қарорларга сабаб сифатида судлар ЕИ кенгаши чеклов чоралари киритилгунга қадар Януковичларнинг Украина судларида ҳимояланиш ҳуқуқидан фойдаланиш имкониятини қўлга киритганини текширмаганини кўрсатди. Ушбу чора-тадбирлар бир йил муддатга амал қилади ва ҳар йили янгиланади, шунинг учун ҳар бир бундай қарор алоҳида ҳуқуқий ҳужжат ҳисобланади, ҳар бир йиллик санкциялар учун даъволар алоҳида тақдим этилган.
ЕИ Януковични чиқариб ташлаган санкциялар рўйхатига дастлаб 18 киши киритилган бўлса, аста-секин Брюссел айбланувчиларни ундан чиқариб ташлади. Украина бош вазири Денис Шмигал 2021 йилда Европа иттифоқининг ушбу қадамларини изоҳлар экан, воқеаларнинг ривожланишини табиий деб атади. «Санкциялар ўз ролини ўйнади, ўғирланган маблағлар ёки қимматбаҳо нарсалар қайтарилган айрим шахсларга келсак, албатта, у ерда санкциялар ўз таъсирини якунлаши мумкин», деб тушунтирди Шмигал.
Украинанинг собиқ бош прокурори Руслан Рябошапка DW билан суҳбатда бош вазирнинг баёнотини танқид қилиб, Украина расмийлари ҳақиқатда ўзларидан олдинги раҳбарларнинг коррупциясини тўлиқ текшира олмаганини ва Янукович томонидан олиб қўйилган маблағларни қайтариб ололмаганини таъкидлади. «2014 йилда Европа иттифоқи аввалги ҳукумат томонидан маблағ ўғирланганига оид далилларни тақдим этиш ваъдалари эвазига санкциялар киритди. Украина ҳукумати эса бу далилни тақдим эта олмади», деб таъкидлади собиқ бош прокурор.
