Gulagu.net лойиҳаси асосчисига Францияда суиқасд уюштирилди

Gulagu.net инсон ҳуқуқлари лойиҳаси асосчиси Владимир Осечкиннинг хабар беришича, бир неча кун олдин уни оиласи билан яшайдиган Франциянинг Биарриц шаҳрида отиб кетмоқчи бўлишган. Bellingcat лойиҳасининг болгариялик терговчи журналисти Христо Грозев қотиллик олдини олишга ёрдам берди, у суиқасд тайёрланаётгани ҳақида огоҳлантирди, деди ҳуқуқ ҳимоячиси 19 сентябр, душанба куни кечқурун Юлия Латининанинг YouTube-каналида.

«Унинг ва манбасининг хабари менга ҳамда хавфсизлигим ва ҳимоям билан шуғулланганларга қотилликнинг олдини олишга ёрдам берди», деди Осечкин. Унинг сўзларига кўра, бўлажак қотиллик ҳақида маълумот олганидан сўнг у оиласи билан икки кунга тоғга кетган, қайтиб келганида эса суиқасдга уриниш содир этилган. 

У террасада бўлган ва кўз қири билан уйнинг девори бўйлаб ўзи томон ҳаракатланаётган шарпани пайқаган. «Биз махсус тайёргарликдан ўтгандик, бунга тайёргарлик кўрдик, ўқитилдик, нима бўлса ҳам иккиланмаслик ва бизни топишмаслиги учун ҳаракат қилдик. Энг ҳимояланган хоналардан бирида болаларим ва хотиним икки соат давомида полга ётиб яширишди», - деди россиялик ҳуқуқ ҳимоячиси. 

Воқеа жойига полиция етиб келган ва қўшниларни сўроқ қилган, улар ўқ овозини эшитишган. Осечкиннинг сўзларига кўра, у ўқотар қуролдан узилган. «Улар менга тегмади, ўқ узилди, мени нишонга олиншди», деб таъкидлади у ҳамда қотилнинг хатолари ва реакцияси яшин тезлиги омон қолишига ёрдам берганини қўшимча қилди. Gulagu.net асосчиси суиқасд бўйича қўзғатилган жиноий иш доирасида олиб борилаётган тергов сирини ҳисобга олиб, қўшимча маълумот бермади. Шу билан бирга, Осечкиннинг айтишича, бу уринишга Россиядан буюртма берилган ва у «ФХХ, уюшган жиноятчилик билан чамбарчас боғлиқ» шахс томонидан тайёрланган.

2020 йил июл ойида Москванинг Головинский суди 2015 йилдан бери Россиядан ташқарида яшаб келаётган Осечкинни фирибгарлик иши бўйича сиртдан ҳибсга олди. Gulagu.net Россия колониялари ва қамоқхоналаридаги қийноқлар ҳақидаги маълумотларни бир неча бор эълон қилган. Хусусан, 2021 йил октябр ойида Gulagu.net Саратовдаги 1-сонли сил касалхонасида маҳкумларни қийнаш ва жинсий зўравонлик ишлатиш ҳолатлари акс этган бир нечта видеоларни эълон қилди. Бу Саратов области бўйича Федерал жазони ижро этиш хизмати раҳбарининг истеъфога чиқишига, идора 18 нафар ходимининг ишдан бўшатилишига, жинсий зўравонлик ва мансаб ваколатини суиистеъмол қилиш фактлари бўйича бир қатор жиноий ишларнинг қўзғатилишига олиб келди.  

Gulagu.net ҳуқуқ ҳимоячилари қамоқ жазосини ўтаётиб, сил касалхонасида видеокузатув камералари маъмури бўлиб ишлаган Сергей Савелевдан маҳбусларнинг қийноқлари акс этган 40 гигабайт видеоёзувларни олган. Видео эълон қилингандан сўнг Савелев Францияга жўнаб кетди ва у ердан сиёсий бошпана сўради. Россияда у компьютер маълумотларига ноқонуний киришда айбланиб, қидирувга берилган.