Россия президенти Владимир Путиннинг Украинада ядро қуролидан фойдаланиш таҳдидига жиддий муносабатда бўлиш керак, деди Марказий разведка бошқармаси собиқ директори Дэвид Петреус 2 октябр, якшанба куни Американинг ABC телеканалига берган интервьюсида.
У АҚШ президентининг миллий хавфсизлик бўйича маслаҳатчиси Жейк Салливан билан Оқ уйнинг Россия ядровий зарбасига эҳтимолий жавобини муҳокама қилмаганини таъкидлади, аммо АҚШ ва НАТОнинг жавоби қандай бўлиши мумкинлигини айтди.
«Сизда маълум бир тасаввурни уйғотиш учун тушунтираман: биз Украина ва Қримдаги жанг майдонида кўришимиз ва аниқлашимиз мумкин бўлган ҳар қандай анъанавий рус кучларини ва Қора денгиздаги ҳар бир кемани йўқ қиладиган НАТОнинг жамоавий саъй-ҳаракатларига раҳбарлик қилиш орқали жавоб берамиз», деди Петреус.
Марказий разведка бошқармаси собиқ раҳбари телебошловчининг Россия томонидан ядро қуролидан фойдаланиш эҳтимолидан кейин НАТО давлатлари ҳудудига радиация тарқалишини Шимолий Атлантика альянси аъзоси бўлган давлатга ҳужум сифатида баҳолаш мумкинлиги ҳақидаги сўзларига қўшилди. «Бу жавобсиз қолиши мумкин эмас», деди Петреус ва АҚШ ҳамда НАТО ядровий кескинликнинг олдини олишига ишонишини қўшимча қилди.
Ҳатто Путиннинг Украинада ядро қуролидан фойдаланиши ҳам жанг майдонидаги вазиятни ўзгартирмайди, дейди Дэвид Петреус. Унга кўра, Украина ҳудудини аннексия қилишга уриниш Путиннинг «умидсиз» қадамидир. «У ютқазмоқда. У жанг майдонида дуч келаётган воқелик, менимча, орқага қайтмас. Ҳеч қандай сафарбарлик ёки аннексия, ҳатто яширин ядро таҳдиди ҳам уни бу вазиятдан олиб чиқа олмайди», - деди Марказий разведка бошқармаси собиқ директори.
Петреуснинг сўзларига кўра, сўнгги етти ой ичида Украина ўз армиясини «Россияга қараганда беқиёс яхши даражада» сафарбар қилган, жиҳозлаган, ўқитган ва ташкил этган, бунинг натижасида Украина қуролли кучлари ҳозирда Россияникидан «каттароқ ва анча самаралироқ».
«Айни пайтда у (Путин) бу борада ҳеч нарса қила олмайди. Жанг майдонидаги мағлубиятлар давом этади. Ягона савол шундаки: биз қачон алоҳида аскарлар ва бўлинмалар таслим бўлишини эмас, балки кўпроқ йирик тузилмаларнинг қулашини кўра бошлаймиз? Менимча, бу яқинлашмоқда», деб прогноз қилди Дэвид Петреус.
«Путин, худди Россия Наполеон ва нацистлар билан бўлгани каби, Европадан кўпроқ «азоб чекиши» мумкинлигига ишонади, лекин у муваффақиятга эришади, деб ўйламайман. Европани оғир қиш кутяпти, газ таъминоти камаяди, лекин у буни енгиб ўта олади ва Украинани қўллаб-қувватлашдан бош тортмайди», дея қўшимча қилди Петреус.
