Тинчлик бўйича Нобел мукофоти Украина, Беларус ва Россиядаги инсон ҳуқуқлари ҳимоячиларига берилди

2022 йил учун Тинчлик учун Нобел мукофоти лауреатларига Россия, Беларус ва Украина ҳуқуқ ҳимоячилари айланди: Россиянинг «Мемориал» инсон ҳуқуқлари жамияти, Украинанинг «Фуқаро эркинликлари маркази» жамоат ташкилоти ва Беларус «Весна» инсон ҳуқуқлари маркази асосчиси Алес Беляцкий. Нобел қўмитаси ўз қарорини 7 октябр, жума куни эълон қилди. 

Тинчлик мукофоти, Алфред Нобелнинг васиятига кўра, «энг катта муваффақиятга эришган ёки халқларни бирлаштириш ва амалдаги армиялар сонини камайтиришда бошқалардан кўра кўпроқ хизмат қилган, шунингдек, тинчлик конгресслари ўтказган ва уларга эътибор қаратган кишига берилади».

Жорий йилда Тинчлик мукофотига 251 киши ва 92 ташкилот ариза топширган бўлиб, номзодларнинг умумий сони – 343 – мукофот тарихидаги иккинчи энг кўпи бўлди. Рекорд 2016 йилда, 376 номзод бўлганида ўрнатилган эди. 

Ўтган йили «Новая газета» бош муҳаррири Дмитрий Муратов тинчлик бўйича Нобел мукофоти совриндорларидан бирига айланди. У билан бирга мукофот филиппинлик журналист Мария Рессега топширилди. Муратов ва Ресса «демократия ва матбуот эркинлиги тобора ноқулай шароитларга дуч келаётган дунёда» бу идеал учун курашаётган барча журналистлар вакилидир, дея таъкидлаб ўтганди қўмита.

Муратов Тинчлик учун Нобел мукофотига сазовор бўлган учинчи россиялик бўлди. Ундан олдин у физик ва ҳуқуқ ҳимоячиси Андрей Сахаровга ва СССРнинг ягона президенти Михаил Горбачёвга берилган.