Россиянинг Су-34 бомбардимончи самолёти Краснодар ўлкасининг Ейск шаҳридаги тўққиз қаватли уй атрофига қулади. Бу ҳақда дастлаб «Интерфакс» шаҳар ягона навбатчи диспетчерлик хизматига таяниб хабар тарқатди. Аниқлик киритилишича, 17 октябр куни маҳаллий вақт билан соат 18:20 да ўқ-дорилар билан тўлиқ жиҳозланган самолёт «Меотида» савдо маркази яқинида, Красная кўчаси 47/1 уй ҳовлисига қулаган. Ҳалокат ортидан самолёт ўқ-дорилари портлаган, олов 556 киши истиқомат қилиб келган кўп қаватли уйга ўтган.
Mash канали ҳалокатдан олдинги ҳолат акс этган видеони намойиш этди. Унда самолёт портлашдан олдин уйлар томи устида пастлаб учаётгани ва унинг бир двигатели ёна бошлаганини кўриш мумкин.
ФВВнинг сўнгги маълумотларига кўра, самолёт қулаши оқибатида 13 киши ҳалок бўлган, 19 киши яраланган. «Қутқарувчилар ишни якунлашди. Қидирув-қутқарув ишлари давомида 10 қурбон жасади аниқланди. Шу тариқа, қурбонлар сони 13 кишига етди, шундан уч нафари болалар. Фавқулодда ҳолат оқибатида 19 киши жабрланган», — дейилади ФВВ хабарида. Жабрланганларнинг икки нафари ҳомиладор аёллар.
Ёнғин турар жойдаги камида 17 квартирага зарар етказган, бу ҳақда Краснодар ўлкаси губернатори Вениамин Кондратьев маълум қилди. Худди шу вақтда шаҳар навбатчи-диспетчерлик хизмати олов у ёки бу даражада камида 45 квартирага зарар етказгани ҳақида маълум қилган. Хизмат маълумотига кўра, ёнғин подъездлардан бирини тўлиқ қамраб олган, бу ерда тўққизинчи қаватдан бешинчи қаватгача қулаш кузатилган. Ўлка ФВВ эса ҳалокатдан сўнг биринчи қаватдан бешинчи қаватгача бўлган уйлар олов ичида қолганини хабар қилган.
«Подслушано в Ейске» телеграм-канали ўз ўқувчиларига асосланган ҳолда айрим одамлар юқори қаватлардан сакрагани ҳақида ёзган. Краснодар ўлкаси вице-губернатори Анна Минькова ҳам шифокорлар қурбонларнинг уч нафари юқори қаватлардан сакраб ҳалок бўлганлар эканини хабар қилган.
ФВВ хабарига кўра, ёнғин 2 минг квадрат метр майдонни қамраб олган. Кондратьевнинг маълум қилишича, воқеа жойида «барча ҳудудий ва минтақавий ёнғин-қутқарув гарнизонлари» ишламоқда. Лекин қутқарувчилар ҳозирча оловни ўчира олишмаган.
