Россияда «Орлан» дрони ишлаб чиқарувчиси эҳтиёт қисмларни Ғарбда сотиб оляпти

Россия Украинага қарши урушда "Орлан-10" дронларидан фойдаланяпти. Уларнинг петербурглик ишлаб чиқарувчиси санкцияларни четлаб ўтиб, Америка Қўшма Штатлари ва Хитойда бутловчи қисмларни сотиб оляпти, деб маълум қилди «Важные истории».

Фото: Орлан-10

Украинага қарши уруш учун "Орлан-10" дронларини ишлаб чиқарувчи Санкт-Петербург компанияси АҚШ, Хитой ва Россиядаги воситачи фирмалар орқали Ғарб санкцияларини четлаб ўтиб, хорижий компонентларни сотиб оляпти. Бу ҳақда 15 декабрь, пайшанба куни эълон қилинган "Важные истории", Reuters ва Британия Мудофаа тадқиқот институти (RUSI) ўтказган суриштирув материалларидан маълум бўлди.

Россия 2014 йилдан бери Украинада "Орланлар"дан фойдаланмоқда. Суриштирувчилар аниқлаганидек, дрон асосан хорижий компаниялар - Американинг Altera ва Xilinx, Texas Instruments, Microchip Technology, Analog Devices, Linear Technology, Европанинг STMicroelectronics ва NXP Semiconductors, Япониянинг Renesas Electronics ва Saito Seisakusho компаниялари томонидан ишлаб чиқарилган компонентлардан йиғилган.

Россияда «Орланлар»ни ишлаб чиқариш билан Санкт-Петербургнинг «Махсус технологиялар маркази» (МТМ) компанияси шуғулланади, у 2016 йилдан бери «ГРУга электрон разведка ишларини олиб боришда ёрдам бергани» учун АҚШ санкциялари остида. Тергов маълумотларига кўра, МТМ учун хорижий компонентларнинг асосий етказиб берувчиси "СМТ-Айлогик" ҳисобланади. Январдан октябргача у 25,7 миллион долларлик маҳсулот импорт қилган.

"СМТ-Айлогик", ўз навбатида, хорижий компонентларнинг асосий қисмини Канаданинг Торонто шаҳрида яшовчи россиялик Александр Трофимовга тегишли бўлган Ҳонгконгнинг Asia Pacific Links компаниясидан олади. Журналистлар аниқлашича, 2017 йилдан бери Asia Pacific Links "СМТ-Айлогик" компаниясига 12 миллион долларлик компонентлар етказиб берган. Бу миқдорнинг ярмига яқини Россиянинг Украинага бостириб кириши бошланган даврга тўғри келади.

Америка воситачиси Алекс Стэнтон номи билан ҳам танилган Россия ва АҚШ фуқароси Игор Кажданга тегишли Ik Tech компаниясидир. 2018 йилдан 2021 йилгача Ik Tech Россияга 2,2 миллион долларлик маҳсулот етказиб берди. Уларнинг 90 фоиздан ортиғи "СМТ-Айлогик" буюртмаларига тўғри келди. Ушбу элементлар орасида Gumstix томонидан ишлаб чиқарилган 1400 та процессор модуллари бор эди. Бундай компонентлар Украинада Россия «Орланлари»да топилган.

Экспорт назорати қоидаларини бузиш жиноий жавобгарликка сабаб бўлади. Шу билан бирга, агар етказиб бериш учинчи давлатдаги воситачи орқали ўтса ва компонентлар экспорт назоратига тегишли бўлмаса, ишлаб чиқарувчилар ҳеч нарсадан хавфсирамаса ҳам бўлади, дейди суриштирув муаллифлари.