Медведевнинг адвокати Брюнъюльф Риснес BBC билан суҳбатда унинг мижози Осло ҳудудида бўлиб тургани ва унга чегарани ноқонуний кесиб ўтиш бўйича айблов қўйилишини айтган.
Норвегия шимолидаги Финнмарк провинцияси полиция штаби бошлиғи Тарьей Сирма-Теллефсеннинг айтишича, россиялик чегарачилар патрули томонидан қўлга олинган ва бошпана сўраган.
Норвегия чегара хизмати россиялик Россия билан чегарани кесиб ўтганидан кейин қўлга олинганини тасдиқлаган, аммо хавфсизлик ва шахсий дахлсизлик нуқтайи назарида бошқа изоҳ бера олмаслигини билдирган.
Аввалроқ Андрей Медведев Норвегияга қочиб ўтгани ҳақида Gulagu.net ҳуқуқ ташкилоти хабар берганди.
«Командир Евгений Нужин («Кусок» лақабли) ва «Вагнер» ХҲК 7-штурм отрядининг 4-взвод 1-бўлими қўмондони Андрей Медведев Россия Федерацияси ҳудудини 12 январ куни Мурманск области «Никель» аҳоли яшаш манзили яқинида тарк этган ва Норвегияга ўтган, ҳуқуқ-тартибот органлари ходимларига мурожаат қилиб, ҳимоя ва сиёсий бошпана сўраган. Медведев қўриқчилар билан маҳаллий аэропортдан Ослога олиб кетилган, у ерда миграция қонунчилигини бузганлар учун марказдан яшаш жойи тақдим этилган, шу кунларда сиёсий бошпана ва халқаро ҳимоя бериш жараёни бошланади», дейилади Gulagu.net телеграм-канали хабарида.
Проект аудиоинтервью эълон қилган, унда Медведев Россиянинг Норвегия билан қуруқлик чегарасини ноқонуний кесиб ўтгани, оқ камуфляж халатида қочгани, Россия чегарачилари уни Норвегия чегарасига 2 километр қолганда аниқлаб, унга қарата ўт очган ва хизмат итини унинг орқасидан қўйиб юборганини айтади.
«Мен музлаган кўлга томон югурдим, улар орқамдан югуришдан қўрқди, чунки муз жуда юпқа эди. Орқамдан итни қўйиб юборишди, лекин у симга ўралашиб қолди. Мен Норвегиядаги энг яқин аҳоли пунктигача югурдим», дейди Медведев.
У ўз ҳаёти учун хавфсирамоқда, чунки уни нафақат ҳуқуқ-тартибот органлари, балки «Вагнер»даги собиқ қуролдошлари ҳам қидирмоқда.
Аввалроқ Медведев «Вагнер»нинг ҳарбий ҳаракатлар чоғида буйруқларни бажаришдан бош тортган ёлланма жангчилари сафдошлари томонидан судсиз қатл қилинганига гувоҳ бўлгани ҳақида айтганди.
У халқаро судда гувоҳлик кўрсатмаси беришга тайёрлигини айтган.
Медведевнинг адвокати сўзларига кўра, унинг мижози хусусий ҳарбий компания сафини Украинадаги ҳарбий жиноятларга гувоҳ бўлганидан кейин тарк этган.
