Полша Leopard 2'ни топшириш учун «кичик коалиция» тузиши мумкин

Агар Германия ҳукумати Leopard 2 жанговар танкларини Украинага бермаса, Полша Киевни ўз арсеналларидан «замонавий жиҳозлар» ва «замонавий танклар» билан таъминлайдиган давлатлардан иборат «кичик коалиция»ни тузади, деди 22 январь, якшанба куни PAP агентлигига берган интервьюсида Полша бош вазири Матеуш Моравецкий. У Германия канцлери Олаф Шольцнинг Украинага Leopard танкларини етказиб бериш борасидаги позициясини кескин танқид қилди. «Германиянинг бу борадаги позицияси қабул қилиниши мумкин эмас», - деди Моравецкий.

«Россиянинг тажовузкор уруши туфайли ҳар куни бегуноҳ одамлар ҳалок бўлмоқда. Россия бомбалари Украина шаҳарларини вайрон қилмоқда. Фуқаролик нишонлари зарбага олинмоқда, аёллар ва болалар ҳалок бўлмоқда», - деди Полша бош вазири.

Рамштайндаги Украина бўйича алоқа гуруҳининг яқинда бўлиб ўтган йиғилишидан олдин ҳам Полша Leopard танкларини Украинага ўз захираларидан ўтказишга тайёрлигини билдирди, аммо бунинг учун биринчи навбатда Германиянинг ушбу ҳарбий техникани ишлаб чиқарувчи мамлакат сифатида розилиги керак. Германия ҳозирча рози бўлган ягона нарса - уларнинг қанчасини Украинага топшириш мумкинлигини кўриш учун Leopard танкларини инвентаризация қилиш.