Шольц: Германия Киевга 14 та Leopard 2 А6 танкини беради

Биринчи босқичда Германия Киевга Бундесвер захирасидан 14 та Leopard 2 А6 танкидан иборат ротани беради. Берлин, шунингдек, бошқа мамлакатларга УҚКга жанговар танкларни реэкспорт қилиш имконини яратади.

Фото: Philipp Schulze / DPA

Германия федерал канцлери Олаф Шольц Украинага Leopard жанговар танкларини етказиб бериш ниятини расман тасдиқлади. Бу ҳақда у 25 январь, чоршанба куни Берлинда Бундестагда сўзлаган нутқида айтиб ўтди. Биринчи босқичда Германия Киевга Бундесвер захирасидан 14 та Leopard 2 А6 танкидан иборат ротани беради. Берлин, шунингдек, бошқа мамлакатларга танкларни Украина Қуролли кучларига реэкспорт қилишига рухсат беради. Вазифа зудлик билан Украина учун иккита танк батальонини йиғишдир, деди Шольц. Бундесвернинг танк батальонининг таркиби одатда 44 та танкни ўз ичига олади. Шу тариқа, гап Украинага европалик шериклар томонидан Leopard 2 типидаги 90 га яқин жанговар транспорт машиналарни етказиб бериш ҳақида кетаётган бўлиши мумкин.

Украина экипажларини тайёрлаш имкон қадар тезроқ Германияда бошланиши керак. Янги ёрдам пакети логистика, ўқ-дорилар ва тизимларга техник хизмат кўрсатишни ҳам ўз ичига олади.

Бу қадам Германиянинг энг яқин европалик ва халқаро ҳамкорлари билан олиб борилган интенсив маслаҳатлашувлар натижасидир, деди канцлер. «Ушбу қарор Украинани қўлимиздан келганча қўллаб-қувватлаш бўйича бизнинг позициямизга тўғри келади. Биз халқаро миқёсда яқин мувофиқлаштириш ва ҳамжиҳатликда ҳаракат қилмоқдамиз», - дейилади ҳукумат баёнотида.

Биринчи марта Украина бош вазири Денис Шмихал 2022 йил 4 сентябрда Берлинга жанговар танкларни етказиб бериш бўйича сўров билан мурожаат қилганди. Бироқ, Шольц бу сўровни рад этди. Расмий Берлин ўзининг вазмин позициясини Россиянинг Украинага қарши урушининг авж олиши таҳдиди ва Киевга ҳарбий ёрдам кўрсатиш масаласида халқаро мувофиқлаштириш зарурлиги билан изоҳлади. Канцлер Шольц Украинага ушбу турдаги қуролларни тақдим этишда иккилангани учун, жумладан, Германиядаги ҳукмрон коалициядаги сафдошлари томонидан бир неча бор танқид қилинди.

Канцлернинг эҳтиёткор позициясида немис сайловчиларининг кайфияти муҳим роль ўйнади. ARD-Deutschlandtrend дастурида Украинага немис қуроллари етказиб берилиши бўйича жамоатчилик фикри натижаларини тақдим этувчи infratest-dimap Жамоатчилик фикрини ўрганиш институти сўнгги сўровига кўра, тадқиқот иштирокчиларининг 46 фоизи жанговар танклар етказиб бериш тарафдори, 43 фоизи қарши чиқди.