Жиноят деб эълон қилинган бу ҳаракатни биринчи марта содир этганлик учун жиноий эмас, маъмурий жавобгарликка тортиш тартибига ўтиш таклиф этилмоқда. Амалдаги жазо – 3 йилгача қамоқ.
Ўзбекистонда учувчисиз учадиган аппаратларни, уларнинг бутловчи ва эҳтиёт қисмларини қонунга хилоф равишда олиб кириш, ўтказиш, олиш, сақлаш ёки улардан фойдаланиш ҳаракатларини биринчи марта содир этганлик учун маъмурий жавобгарликни белгиланиши мумкин.
2023 йилги давлат дастури лойиҳасига кўра, декабр ойига қадар тегишли қонун лойиҳаси ишлаб чиқилади.
Бу тоифадаги ҳуқуқбузарликлар учун Жиноят кодексига белгиланган санкцияларга муқобил жазо чораларини киритиш ҳам таклиф этилмоқда.
Эслатиб ўтамиз, Ўзбекистонда учувчисиз учадиган аппаратларни қонунга хилоф равишда олиб кириш, ўтказиш, олиш, сақлаш ёки улардан фойдаланиш 2019 йилда жиноят деб эълон қилинган. Буни содир этганларга 3 йилгача қамоқ жазоси берилади.
Агар шахс бу нарсаларни ўз ихтиёри билан топширса, жавобгарликдан озод қилинади. Оғирлаштирувчи ҳолатлардаги жазо эса – 3 йилдан 10 йилгача қамоқ.
