Жаҳон | 13:09 / 11.02.2023
12915
4 дақиқада ўқилади

Беларусда яна икки нафар «рельс партизани» 22 йилга қамалди

Беларус суди Бобруйскдан бўлган икки «рельс партизани»ни қамоқ жазосига ҳукм қилди. Яна бири сукут сақлагани учун судланди.

Фото: іntex-press by

Могилев вилоят суди темирйўлларда қўпорувчилик ҳаракати тайёрлашда айбланган Бобруйскдан бўлган уч нафар фуқарога нисбатан ҳукм чиқарди, деб хабар қилди Беларуснинг «Вясна» инсон ҳуқуқлари маркази 10 февраль, жума куни. Улар - Дмитрий Климов, Владимир Аврамцев ва Евгений Минкевич 2022 йил март ойи охирида Беларусда қўлга олинган. Операция давомида хавфсизлик кучлари уларни ўлдириш учун ўққа тутган ва Климов яраланган.

Климов ва Аврамцев Беларус Жиноят кодексининг бир қатор ўта оғир моддалари, жумладан, террорчилик ҳаракати, давлатга хиёнат, террорчилик ташкилотида иштирок этиш ва транспорт воситаси ёки алоқа воситаларини қасддан яроқсиз ҳолга келтириш бўйича 22 йилга озодликдан маҳрум этилди. Тергов маълумотларига кўра, улар Осиповичи яқинидаги темирйўл линиясидаги иккита реле шкафини йўқ қилишда қатнашган.

Тергов судланувчиларни айблаган ҳаракатлар одатда темирйўл участкасида светофорларнинг ишламай қолишига олиб келади, бу эса поездлар жадвалини бузади - шу жумладан Украинадаги уруш учун Россия Қуролли кучларининг қуроллари ва ҳарбий техникаси ортилган поездлар учун. Улар 2022 йил баҳори Беларус ҳудудидан фаол равишда олиб ўтилган.

Айнан шундай ҳаракат ва Александр Лукашенко режимига қарши туриш тактикасига собиқ хавфсизлик ходимларининг ByPol уюшмаси беларусларни (Беларусда экстремистик тузилма сифатида тан олинган) чақирди. Шу билан бирга, ByPol   маълумотларига кўра, бундай ҳаракатлар беларусликларнинг ҳаёти ва соғлиғига таҳдид солмайди, балки БелЖД инфратузилмасига катта зарар етказади. Шундай қилиб, ҳар бир йўқ қилинган қурилма нархи тахминан 50 минг долларни ташкил этади ва Беларусда уларни алмаштириш учун тўпламлар унчалик кўп эмас.

Суд Минкевични «жиноят ҳақида хабар бермаслик» моддаси бўйича 1,5 йилга озодликдан маҳрум қилди, аммо у суд залидан озод қилинди, чунки бу муддатнинг бир қисмини ҳибсда ўтказган, қолгани эса «Халқ бирлиги куни муносабати билан амнистия тўғрисида» қонунга мувофиқ қисқартирилган. Учала фуқаро устидан суд жараёни ёпиқ эшиклар ортида ўтди.

27 декабрь куни Гомел вилоят суди Беларусда Россия ҳарбий техникаси бўлган поездлар Украинадаги урушда қатнашиш учун ҳаракатланган темирйўлда саботаж қилишда айбланаётган уч нафар беларуслик устидан ҳукм эълон қилганди. 

Денис Дикун 23 йилга, Дмитрий Равич 22 йилга, Олег Молчанов эса 21 йилга озодликдан маҳрум этилган. Шунингдек, ҳар бирига 4800 Беларус рубли миқдорида жарима солинди ва тинтувлар давомида аниқланган мол-мулки мусодара қилинди.

Тергов маълумотларига кўра, 28 февраль куни Гомел вилояти Светогорск шаҳрининг уч нафар фуқароси Дикун, Равич ва Молчанов «Жерд-Останковичи» темирйўл линиясида (Гомел вилояти) реле шкафига ўт қўйган. Шу сабабли, участкада светофорлар ва кўрсаткичлар ишлашни тўхтатди, бу эса Украинадаги уруш учун РФ Қуролли кучларининг қуроллари ва ҳарбий техникаси бўлган поездлар жадвалида узилишларга олиб келиши мумкин эди.

Учаласи ҳам 4 март куни Светлогорскда ҳибсга олинган ва уларга бир нечта моддалар бўйича айблов қўйилган: Жиноят кодексининг 361-1-моддаси 3-қисми («Экстремистик тузилишда иштирок этиш»), 289-модда 3-қисм («Уюшган гуруҳ таркибида содир этилган, оғир оқибатларга олиб келадиган, одамлар учун ўлим хавфини туғдирадиган ва уларга тан жароҳати етказадиган террорчилик ҳаракати»), 309-модда 2- ва 4-қисми («Алоқа воситаларини қасддан яроқсиз ҳолга келтириш, бу оғир оқибатларга олиб келиши, шунингдек авария, бахтсиз ҳодиса ва одамларнинг ўлими хавфини юзага келтириши») ва 356-модда 1-қисм («Давлатга хиёнат»).

Мавзуга оид