Женевада «Марказий Осиё – ўлим жазосидан холи минтақа» ташаббуси бўйича келишувга эришилди

Женевада БМТ Инсон ҳуқуқлари бўйича кенгаши 52-сессиясининг Юқори даражадаги сегменти мажлиси доирасида Марказий Осиё давлатлари ва Мўғулистон делегациялари раҳбарлари ҳамда «Ўлим жазосига қарши халқаро комиссия» ННТ мутасаддилари иштирокида алоҳида тадбир бўлиб ўтди, деб хабар бермоқда «Дунё».

Фото: Dunyo

Тадбир давомида Марказий Осиё давлатлари ва Мўғулистонни ўлим жазосидан холи минтақага айлантириш масаласи юзасидан фикр алмашилди.

Учрашувда Ўзбекистон делегацияси раҳбари, Инсон ҳуқуқлари бўйича Миллий марказ директори Акмал Саидов ўз нутқида «Яшаш ҳуқуқи — ҳар бир инсоннинг табиий ҳуқуқи бўлиб, унга бу ҳуқуқни давлат эмас, балки Яратганнинг ўзи ато этган», дея Ўзбекистон президенти Шавкат Мирзиёевнинг сўзларидан иқтибос келтирди.

Тадбир иштирокчилари Марказий Осиёни ўлим жазосидан холи минтақага айлантириш ташаббусини биргаликда илгари суриш бўйича келишувга эришдилар.

Қонунчилик палатаси спикерининг биринчи ўринбосари, Инсон ҳуқуқлари бўйича Ўзбекистон Республикаси Миллий маркази директори Акмал Саидов бошчилигидаги Ўзбекистон делегацияси 27 февраль – 4 март кунлари Женева шаҳрида (Швейцария) БМТ Инсон ҳуқуқлари кенгашининг (ИҲК) 52-сессияси Юқори даражадаги сегменти ишида иштирок этди.