АҚШ Украинага аввалдан ваъда қилинган Abrams танкларини кузгача етказиб беришни режалаштирмоқда. Бу ҳақда 21 март, сешанба куни Пентагон матбуот котиби Пэт Райдер маълум қилди. Етказиб бериш муддатини қисқартириш учун Вашингтон Киевга замонавийроқ М1А2 ўрнига М1А1 танкининг модификациясини топширишга қарор қилди, деди Райдер.
М1А2 модификацияси танкларини етказиб бериш жадвали қандай бўлиши ҳақида сўралганда, Райдер АҚШ ҳукумати дастлаб аниқ саналарга эътибор қаратмаганини, Abrams'ни жўнатишга бир йилдан кўпроқ вақт кетишини тахмин қилганини айтди.
Январь ойи охирида АҚШ ҳукумати Украинага Abrams'нинг замонавий версиясини, жами 31 та танкни беришини эълон қилди. Ўшанда ҳам Америка Мудофаа вазирлиги бу танклар Америка омборларида етарли эмаслигини ва уларни Украинага топшириш учун бир неча ой кераклигини таъкидлаган.
