«ФСБ» Украина фуқаросини «ҳарбий мухбир» Татарскийнинг ўлимига алоқадорликда айблади

Россия Федерал хавфсизлик хизмати («ФСБ») Украина фуқароси Юрий Денисов Санкт-Петербургдаги кафеда рўй берган портлаш оқибатида ҳалок бўлган «ҳарбий мухбир» Владлен Татарскийнинг ўлимига алоқадорлигини маълум қилди, деб хабар бермоқда ТАСС ва РИА «Новости» агентликлари маҳкама матбуот хизматига таяниб. 

«ФСБ» маълумотларига кўра, Денисов Украина махсус хизматлари кўрсатмаси бўйича 2023 йил февралида Киевдан Латвия ҳудуди орқали Москвага келган ва у ерда Татарскийнинг «турмуш тарзи ва ташриф буюрадиган жойлари» ҳақида маълумот тўплаган. 

Сўнгра «воситачи орқали тезкор етказиб бериш хизмати ёрдамида» «ҳарбий мухбирнинг гипсли бюсти кўринишидаги» портловчи мосламани Даря Треповага топширган. «ФСБ» маълумотларига кўра, қотилликдан сўнг Денисов Россиядан Арманистон орқали транзит билан Туркияга учиб кетган. Қайд этилишича, Денисовни халқаро қидирувга бериш тартиби бошланган. 

«ФСБ», шунингдек, портлашда айбланиб ҳибсга олинган Трепова жиноятни Коррупцияга қарши курашиш фонди («ФБК») раҳбарлари Леонид Волков ва Иван Ждановнинг Россияда «қўпорувчилик фаолияти»га «такрорий чақириқлари» натижасида содир этган, деб ҳисоблайди.

2 апрель куни Санкт-Петербургдаги кафеда юз берган портлаш натижасида таниқли россиялик «ҳарбий мухбир» Владлен Татарский ҳалок бўлганди. Санкт-Петербург бўйича Ички ишлар вазирлигининг бош бошқармаси маълумотларига кўра, 16 киши жароҳатланган. Кейинроқ Санкт-Петербург губернатори Александр Беглов 25 киши жароҳатланганини, улардан 19 нафари касалхонага ётқизилганини аниқлаштирди.

Санкт-Петербургдаги «Фонтанка» нашрининг ёзишича, портлаш содир бўлган кафе «Вагнер» ХҲК эгаси Евгений Пригожинга тегишли. Муассаса фақат шанба ва якшанба кунлари ишлаган, у ерда «Кибер Z фронт» мунозара клубининг йиғилишлари бўлиб ўтган ва уруш тарафдорлари Донбасс, Украина ҳамда дунёда содир бўлаётган воқеаларни муҳокама қилиш учун йиғилган. 2 апрел куни бу ерда Татарский билан «ижодий учрашув» бўлиб ўтган. Евгений Пригожиннинг учрашувга келиши эҳтимоли бўлган.

Тротил эквивалентида 200 грамм бўлган портловчи модда Даря Трепова томонидан портлашдан бироз олдин ҳарбий мухбирга совға қилинган ҳайкалчада бўлган. 

Россиянинг бошқа Telegram-каналлари содир бўлган воқеаларнинг яна бир нечта версияларини кўриб чиқди, шу жумладан янги, «мудофаа» босқичига ўтаётган урушнинг ахборот таъминотини «қайта ўзгартириш»да етарли даражада «тизимли» бўлмаган ўйинчиларни «тозалаш», «ҳарбий мухбир»нинг касбий фаолиятидан норози бўлганлардан бирининг қасоси, шунингдек, «ўтмишдан салом», яъни Владлен Татарский ҳарбий ҳаракатларда қатнашган пайтдаги ишлари учун жавоб.