АҚШ Abrams танкларининг биринчи партиясини Киевга етказиб беришни маъқуллади

Украинага мўлжалланган 31 та танк бир неча ой давомида таъмирланиб, жўнатишга тайёрланаётган эди. Украина Қуролли кучлари ходимларини уларни бошқариш бўйича ўқитиш Германияда ўтказилди.

Фото: US Army

Қўшма Штатларда Abrams танкларининг биринчи партиясини Киевга топшириш бўйича қарор қабул қилинди. «АҚШ томонидан Украинага етказиб берилаётган Abrams танкларининг биринчи партияси дам олиш кунлари (5 ва 6 август) жўнатиш учун маъқулланди, танклар Украинага куз бошида етиб бориши керак», — дея CNN армия таъминот бўлими раҳбари Дуглас Бушнинг сўзларидан иқтибос келтиради.

«Улар (танклар) тайёр, - деди Буш брифингда журналистлар билан суҳбатда. - Энди улар Европага, кейин эса Украинага, барча ҳамроҳлик қилувчи элементлар билан бирга бориши керак. Ўқ-дорилар, эҳтиёт қисмлар, ёнилғи қуйиш жиҳозлари, таъмирлаш қурилмалари. Гап фақат танклар ҳақида эмас, балки улар билан бирга келадиган нарсаларнинг тўлиқ тўплами ҳақида кетяпти».

Май ойининг охири - июнь ойининг бошларида америкалик инструкторлар УҚК ҳарбийларини Германиядаги Графенвёр полигонида Abrams танкларини бошқаришга ўргатишни бошлади.

Украинага мўлжалланган 31 та танк бир неча ой давомида таъмирланиб, жўнатишга тайёрланаётган эди, етказиб беришни бошлаш учун рухсатнома ҳафта охири, 5 ва 6 август кунлари олинган, дея тушунтиради CNN. Айни пайтда, Дуглас Буш биринчи партияга қанча танк киритилишига аниқлик киритмади. 27 июль куни Politico интернет нашри сентябрь ойида Украинада бўлиши мумкин бўлган 6-8 та машина ҳақида гап кетаётган бўлиши мумкинлигини ёзди.