Сергиев Посаддаги портлаш: қурбонлар сони ортиши мумкин

Сергиев Посад шаҳридаги Загорск оптик-механика заводи (ЗОМЗ) ҳудудида юз берган портлаш натижасида 80 киши жароҳат олди, улардан 15 нафари шифохонада, деб хабар берди Россия Соғлиқни сақлаш вазирлиги 10 август, пайшанба куни кечқурун. Жабрланганлардан уч нафари шаҳарнинг марказий туман касалхонасида оғир аҳволда, яна бири Москвадаги Бурденко марказига эвакуация қилинган, дея хабар беради идора. 

Baza ТК: 48 та инсон танаси бўлаклари топилган 

Бунгача бир жабрланувчи шифохонада вафот этгани маълум бўлган эди. 12 киши бедарак йўқолган деб топилди. «112» Telegram-каналига кўра, улардан тўрт нафари топилган – улардан икки нафари меҳмонга кетган, яна икки нафари уйда бўлган. 

Baza Telegram-канали воқеа жойида 48 та инсон танаси бўлаклари ҳам топилганини, тахминларга кўра, улар ўн кишининг жасадига тегишли эканлигини таъкидламоқда. 

Тергов версияси - техника хавфсизлиги қоидаларини бузиш 

Тергов маълумотларига кўра, кеча, 9 август куни эрталаб Сергиев Посаддаги ЗОМЗ ҳудудида кузатилган кучли портлашга саноат хавфсизлиги талабларининг бузилиши сабаб бўлган. Унга ижарачилардан бири - 2023 йил март ойида банкрот бўлган «Пиро-Росс» ОАЖ йўл қўйган бўлиши мумкин. 1994 йилдан бери корхона профессионал салют мосламалари ва фейерверкларни, шу жумладан РФ Мудофаа вазирлиги томонидан буюртма қилинганларни ишлаб чиқариш ва сотиш билан шуғулланган. Дастлаб компаниянинг сўнгги директори Сергей Чанкаев буни рад этиб, портлаш яқин атрофдаги металл қувурлар ўрнатилган омборхонада содир бўлганини айтди. 

Бироқ 10 август куни унинг ўзи гумондор сифатида қўлга олинган. Компаниянинг офисида тинтув ўтказилди. Терговчилар, шунингдек, бошқарув гуруҳи ходимларини сўроқ қилди. 

Украина учувчисиз учоғининг, расмий маълумотларга кўра, салют мосламалари ва улар учун зарядлар сақланган омборга ҳужуми ҳақидаги версия РТҚнинг Москва вилоятидаги бош тергов бошқармаси томонидан дарҳол рад этилди.