Навоийда уй эксплуатацияси учун тўловлардан қарзи борлар электр тармоғидан узилиши мумкин

Навоий шаҳрида кўп қаватли уйларнинг умумий мол-мулкини сақлаш, ундан фойдаланиш ва уни таъмирлаш, туташ ер участкаларини ободонлаштириш учун мажбурий бадал ва тўловлардан қарзи борларни электр энергияси тармоғидан узиш тартиби синов тариқасида жорий этилиши мумкин.

Бу Ўзбекистон президентининг 15 августдаги қарори билан тасдиқланган кўп қаватли уйларни самарали бошқариш бўйича «йўл харитаси»да (.pdf) назарда тутилган.

Қурилиш ва уй-жой коммунал хўжалиги вазирлигига ушбу тартибни 1 октябргача ишлаб чиқиш ва Вазирлар Маҳкамасига киритиш юклатилган.

Қарорда бундай тартиб қачондан жорий этилиши ҳақида маълумот берилмаган. Шу билан бирга, синов муваффақиятли чиқса, Ўзбекистоннинг бошқа ҳудудларида ҳам бундай тартиб қўлланиши ҳақида банд йўқ.