Тошкентда бедарак йўқолган эркак жасади бошига пакет ўралган ҳолда топилди

Прокуратура қасддан одам ўлдириш моддаси бўйича жиноят иши очди.

Тошкент шаҳри, Чилонзор туманида бедарак йўқолган эркакнинг жасади ўз машинасида, бошига пакет ўралган ҳолда топилди.

1996 йилда туғилган Б.А. 31 август куни кечқурун яшаш манзилидан ўз автомобилида чиқиб кетиб, бедарак йўқолган эди.

Ўтказилган тезкор-қидирув тадбирлари давомида автомобил Чилонзор тумани, Бунёдкор кўчасидаги футбол спорт майдони ҳудудида жойлашган автотураргоҳда экани аниқланган. Унинг ичидан эркакнинг мурдаси бошига полиэтилен пакет ўралган ҳолда топилган.

Ҳолат юзасидан Жиноят кодексининг 97-моддаси (Қасддан одам ўлдириш) 1-қисми билан жиноят иши қўзғатилиб, тергов ҳаракатлари олиб борилмоқда.