Бу билан бир вақтда, 6 сентябр куни Киевга келган АҚШ Давлат котиби Энтони Блинкен Украинага умумий қиймати 1 миллиард доллардан ортиқ бўлган янги ёрдам пакетини эълон қилди. Ушбу ёрдам Украина ҳаво ҳужумидан мудофаа тизимини қўллаб-қувватлашни ҳам ўз ичига олади.
Блинкеннинг айтишича, АҚШ кўмаги Украинанинг қарши ҳужумига ёрдам бериши лозим.
«Сўнгги бир неча ҳафта давомида Украина қуролли кучларининг давом этаётган қарши ҳужумидаги олдинга силжиш тезлашди. Ушбу янги пакет унинг суръатини сақлаб қолишга ёрдам беради ва уни янада кўпроқ дастаклайди», деган АҚШ Давлат котиби Украина ташқи ишлар вазири Дмитро Кулеба билан ўтказилган қўшма матбуот анжуманида.
Украинага Американинг кучсизлантирилган уранли снарядлари етказиб бериш ҳақидаги маълумот Пентагон расмий сайтидаги пресс-релизда тасдиқланган. Ушбу снарядлар АҚШ ҳарбий ёрдамининг 175 миллион доллар миқдоридаги навбатдаги транши доирасида юборилади.
Ёрдам, жумладан, HIMARS ракета тизимлари учун қўшимча ўқ-дорилар, ҳаво ҳужумидан мудофаа тизимлари учун жиҳозлар, Javelin ва танкга қарши AT-4 тизимлари, шунингдек, Abrams танклари учун кучсизлантирилган уранли 120 миллиметрлик танк снарядларини ўз ичига олади.
2023 йил март ойида Буюк Британия мудофаа вазирлиги Украинага Британиянинг Challenger 2 танклари учун таркибида кучсизлантирилган уран бўлган ўқ-дорилар юборишини тасдиқлаган эди.
Бу баёнот Россия расмийлари, жумладан, президент Владимир Путиннинг ўта кескин реакциясига сабаб бўлганди. Путин Буюк Британиянинг Украинага кучсизлантирилган уранли снарядлар етказиб бериш қарорини Россиянинг Беларусга тактик ядро қуролини жойлаштиришига сабаб деб атади.
Шу билан бирга, BBC нашри аввалроқ украиналик ва россиялик қурол-яроғ бўйича экспертларга таяниб, бойитилган уранли ўқ-дорилар Россияда анчадан бери ишлаб чиқарилишини ёзганди.
Кучсизлантирилган уран нима?
Кучсизлантирилган уран — бойитилган уран ишлаб чиқаришда пайдо бўлувчи иккиламчи маҳсулотдир.
У ўзининг юқори зичлиги ва мустаҳкамлиги билан ажралиб туради ва шу фазилатлари туфайли ҳарбий техника учун зирҳ ишлаб чиқаришда ҳам, ўқ-дорилар ишлаб чиқаришда ҳам фойдаланилади. Зирҳ тешувчи снарядлар ядроси асосан кучсизлантирилган урандан ташкил топади.
Кучсизлантирилган уран, гарчи заҳарли ва канцероген (касаллик қўзғовчи) ҳисобланса-да, юқори радиоактивликка эга бўлмайди.
Атом энергияси бўйича халқаро агентлик кучсизлантирилган уран табиий уранга қараганда анча кам радиоактив эканини тасдиқлаган.
