Қўшимча функционаллар
-
Тунги кўриниш
Биржада АИ-80 бензини сотувига чеклов киритилди. UNG тармоғида нарх ошиши рад этилди
Россия бензин экспортини чеклаши ортидан, Ўзбекистон Рақобат қўмитаси АЁҚШларга биржадан АИ-80 бензинини харид қилишида кунига 10 тонналик лимит белгилади. Вақтинчалик чора биржада харидорлар сони икки баробарга қисқаришига олиб келгани айтилмоқда. “Ўзбекнефтгаз” ўз шохобчаларида 1 ноябрдан нарх ошиши мумкинлигини рад этди.
“Ўзбекнефтгаз” 1 ноябрдан бошлаб АИ-80 бензини нархининг ошиши ҳақида интернетда тарқалган хабарларни рад этди.
“Ўзбекнефтгаз” АЖ бу хабарларни асоссиз деб билади ва жамиятга тегишли АЁҚШларда нархлар эски белгиланган тартибда амалга оширилишини маълум қилади”, – дейилади расмий ахборотда.
Нарх ошиши ҳақидаги хабарлар Рақобат қўмитаси томонидан товар-хомашё биржасида АИ-80 бензинининг кунлик савдосига лимит белгилангани маълум бўлиши ортидан тарқалган эди.
Бозор иштирокчиларига таяниб Spot'нинг хабар беришича, эндиликда биржа савдоларининг ҳар бир иштирокчиси кунига максимал 10 тонна бензин сотиб олиши мумкин бўлади. Қўмита бу талаб вақтинчалик эканини маълум қилган. Чеклов 17 октябрдан киритилгани келтирилган.
Бунга жавобан ёқилғи қуйиш шохобчалари вакиллари президент қабулхонасига бензин сотишнинг кунлик лимитини 10 тоннадан 4 тоннагача камайтиришни сўраб хат йўллаган. Хатда мамлакатда бир суткада АИ-80 бензинини ишлаб чиқариш ҳажми ўртача 150 тоннани ташкил қилиши, биржа савдоларида эса 30 тадан 34 тагача хусусий ёқилғи қуйиш шохобчалари иштирок этиши қайд этилган. 10 тонналик кунлик лимитнинг жорий этилиши натижасида биржадаги бензин харидорлари сони икки баробарга ёки 15 тагача қисқариб кетиши, шунингдек, бу ҳудудларда нархларнинг ошишига олиб келиши мумкинлиги айтиб ўтилган.
Тадбиркорларнинг таъкидлашича, белгиланган лимит ёқилғи қуйиш шохобчаларининг бир қисми ёпилишига олиб келган, биржадан бензин сотиб олишга муваффақ бўлган бошқа АЁҚШларда эса навбатлар пайдо бўлган.
Товар-хомашё биржасининг матбуот хизмати Рақобат қўмитаси томонидан АИ-80 русумли бензинини сотиш бўйича кунлик лимит белгиланганини Spot'га тасдиқлаган. Биржадан маълум қилишларича, муаммо чеклов ҳажми билан эмас, балки талабни қондириш учун кўпайтирилиши керак бўлган кунлик таъминот ҳажми билан боғлиқ.
Аввалроқ, Россия ҳукумати ички бозорда нархларни барқарорлаштириш изоҳи билан бензин ва дизел экспортини тақиқлаганди. Таъминотнинг чекланиши эса Россиядан катта миқдорда нефт маҳсулотларини импорт қилаётган Ўзбекистондаги нархларга қўшимча босим ўтказиши мумкинлиги прогноз қилинганди.
