Таҳририятга 6 ойдан бери фарзандини ҳаётга қайтариш учун курашаётган Нилуфар Ҳакимова мурожаат қилди. У соғлом юрган, ҳомиладорлик даврини ҳам яхши ўтказган қизи туғуруқ жараёнидан кейин ачинарли аҳволда эканлигини айтиб, нажот сўраган:
“2005 йилда туғилган қизим Мафтуна Мирзараҳимова ўз вақти-соатида дард билан Учтепа туманидаги 9-перинатал шифохонага ўз оёғи билан борган. Куёвим билан борганда кесарча кесишга кўрсатма бўлмаган. “Ўзи туғади” деб олиб қолишган. Куёвим кутган ва орада жума намозига бориб қайтиб келганда “операция қилдик, Мафтуна беҳуш, комада” дейишган. Мен келганимда қизимнинг аҳволи жуда оғир эди. Бош шифокор Улуғбек Бекжоновга мурожаат қилиб, бошқа шифохонага олиб боришни илтимос қилдим.
Қизим билан нега бундай бўлганини сўрасам, “эпидурал анестезияда реакция берди. Шунинг учун юраги тўхтаб қолди, шошилинч операция қилдик” дейишди”, дейди она.
«25 кунда кўзини очди»
5 ой давомида Республика шошилинч тиббий ёрдам илмий марказида даволанган Мафтунанинг аҳволи яхшиланмаган. Қизининг ҳолати ва даволаниш билан боғлиқ узлуксиз харажатлар ота-онани ҳам руҳий, ҳам молиявий жиҳатдан оғир аҳволга солган.
“27 апрел куни Республика шошилинч тиббий ёрдам шифохонасига ўтказдик. У ерда нейрореанимацияга олишди. 25 кунда кўзини очди, “кома 2 ҳолати” ташхиси қўйилди. Жуда ёмон аҳволда ётарди қизим, юзларини ёпиб қўйишганди. Ҳозиргача оғир аҳволда. Апаллик синдром деган диагноз қўйишган. Қўл-оёқлари қийшайиб, фалажланиб қолган. Наҳотки битта туғишда шу даражага келиб қолса?
Ҳеч ким тилхат ёзмаган, операцияга ҳеч кимдан рухсат олинмаган. Нега операция қилинди, ўзи туғиши керак эди деганимизда “ўзи сўраб олди” деган жавобни айтишди. Ҳамма айбни қизимга тўнкашди. Қизим бу ҳолатида ҳеч нарсани тасдиқлай олмайди. Беш ойдан бери битта “она” деган сўзига зорман. Кўзини очиб ёпади, бир сўз гапира олмайди”.
Маълумот учун: Апаллик синдроми — бош мия пўстлоғи фаолиятининг оғир бузилиши натижасида инсон онги йўқолиб, бир вақтнинг ўзида нафас олиш, юрак-қон томир фаолияти, ютиш каби асосий вегетатив функциялари сақланиб қоладиган неврологик ҳолат. У кўпинча оғир бош-мия жароҳати, реанимациядан кейинги энцефалопатия ёки энцефалитдан сўнг ривожланади. Бемор кўзини очиши мумкин, аммо одатда қарашни мақсадли равишда жамлай олмайди, нутқ ва онгли мулоқот кузатилмайди.
