АҚШ, Япония ва Корея КХДРдан Россияга қурол етказиб берилишини қоралади

Ўз баёнотида уч давлат ташқи ишлар вазирлари КХДРдан қурол етказиб берилиши Украинада қурбонлар сонини оширишини таъкидлади. АҚШ, Япония ва Жанубий Корея ядровий технологияни Пхенянга ўтказиш имкониятидан хавотир билдирган.

Фото: AP

АҚШ, Япония ва Жанубий Корея Шимолий Кореянинг Украинага қарши уруш учун Россияга ҳарбий техника ва ўқ-дорилар етказиб беришини кескин қоралади. «Биздаги маълумотларга кўра, бир қанчаси амалга оширилган бундай таъминотлар Россия уруши қурбонлари сонини сезиларли даражада оширади. Биз халқаро ҳамжамият билан ҳамкорликда Россиянинг КХДРдан ҳарбий техникани қўлга киритишга уринишларини аниқлашда давом этамиз», — дейилади уч давлат ташқи ишлар раҳбарларининг 25 октябр, чоршанба куни АҚШ Давлат департаменти сайтида эълон қилинган қўшма баёнотида.

Ҳужжатда таъкидланишича, «Россиянинг КХДРдан ҳарбий юклар олиб, урушни узайтиришга уринишлари фонида АҚШ, Япония ва Жанубий Корея Украина суверенитети ва Россия уруши оқибатларига қарши туришга уринишларини қўллаб-қувватлаш қатъиятини тасдиқлайди».

Пхенянга ядро технологияси берилиши хавфи

Уч нафар ташқи ишлар вазирлари, шунингдек, «Россия Пхеняннинг ҳарбий мақсадларини қўллаб-қувватлаш учун Шимолий Кореяга бераётган ҳар қандай материални диққат билан кузатишда» давом этишини айтди.

Улар КХДРга қурол-яроғ етказиб бериш ва ундан олиб келиш, шунингдек, КХДРга маълум қисмларни етказиб бериш ва Пхеняннинг оммавий қирғин қуроллари, баллистик ракеталар ҳамда оддий қуролларни яратиш дастурлари билан боғлиқ техник ҳамкорлик БМТнинг қатор қоидаларини бузишини таъкидлади.

Вазирлар ядровий ва ракета технологияларининг Пхенянга ҳар қандай узатилиши эҳтимолидан хавотир билдирди, чунки бу «халқаро ҳамжамиятнинг нозик технологиялар минтақавий хавфсизликни беқарорлаштирувчи, тинчлик ва барқарорликка таҳдид солувчи субъектлар қўлига тушишининг олдини олишга қаратилган саъй-ҳаракатларини хавф остига қўяди».

Шимолий Корея ва Россия ўртасидаги ҳамкорлик

Сентябр ойи ўрталарида Шимолий Корея етакчиси Ким Чен Ин ва Россия президенти Владимир Путин Россияда учрашиб, ҳарбий соҳада кенг ҳамкорлик қилиш бўйича келишиб олган эди. Бундан олдин Ғарб ОАВ Пхеняннинг технология эвазига Россияга артиллерия ўқ-дорилари ва қуролларини топшириш нияти ҳақида хабар берган.

АҚШ Миллий хавфсизлик кенгашининг Оқ уйдаги стратегик коммуникациялар бўйича координатори Жон Кирби айтишича, Шимолий Корея Украинага қарши уруш учун Россияга ҳарбий техника ва ўқ-дорилар солинган мингта контейнер ўтказиб берган.