Тошкент шаҳрида жойлашган Aлишер Навоий номидаги Миллий кутубхона 24/7, яъни узлуксиз ишлаш тартибини вақтинча тўхтатди. Kun.uz бунга қандай муносабатда эканини билиш учун кутубхона фойдаланувчилари, китобхон ва талабаларга микрофон тутди.
20 октябрдан Aлишер Навоий номидаги Ўзбекистон миллий кутубхонаси 24/7 тартибида ишлашни вақтинча тўхтатди. Kun.uz ўтказган кичик сўровномада китобхонлар кутубхонанинг тун-у кун ишлаш тартибига ҳалиям эҳтиёж кўплиги, айниқса, қишда ҳар доимгидан кўпроқ талаб борлиги ҳақида айтишяпти.
"Бу адолатсиз қарор бўлди. Чунки кутубхона учун бюджет ҳисобидан унча кўп пул ажратилмайди, деб ўйлайман. Лекин шунча одам ундан фойдаланяпти. Кутубхона фойдани кўзлаб қилинадиган ташкилот бўлмаслиги керак", – деб ҳисоблайди бир фойдаланувчи.
Бошқа бири эса кўпчилик иш, ўқишини тугатиб кейин кутубхонага келади. Улар қўшимча ишларини қилиб олиши учун ҳам кутубхона тун-у кун очиқ бўлиши керак деб ҳисоблайди. Яна бир фойдаланувчи эса 24/7 тизимида кутубхонанинг барча бинолари ишлаши кераклигини айтяпти.
"Ҳозир фақат битта Б корпуси ишлайди ва кечки сменада кўпинча жой қолмайди, жой бўшашини кутиб туришга тўғри келган пайтларимиз ҳам бўлади", – деди китобхон.
Нега тун-у кун ишлаш тизими қайтарилиши кераклигини яна бир китобхон шундай тушунтиради: "Тадқиқотчи домлалар бор, кечки 11 дан кейин келиб ишлашга мажбур бўлишади. Чунки ўзбекчилик, уйда меҳмон келади ёки бола-чақа сабаб ишлолмайди. Шунинг учун кутубхонага келиб, бу ернинг ашаддий мухлисига айланиб қолишган", – дейди фойдаланувчилардан бири.
Вилоятдан келадиган китобхонларнинг айтишича, тунги смена улар учун жуда фойдали бўлган. Чунки вилоятдан айнан кутубхонадаги манбалар учун келадиганлар тунги сменада ҳам тезроқ ишларини битириб, вилоятларига қайтиб келишлари мумкин бўлади.
Китобхонлардан тунги сменада нечагача қолганлари ҳақида сўралганда, уларнинг кўпи тунги 2-3 деб жавоб беришди. Сўровномада қатнашган кўпчилик тунда келиб, эрталабгача қолиб ишини қилишини айтган бўлса, ҳатто китобхонлар ичида 24 соат вақтини кутубхонада ўтказганлар ҳам бор.
