ҲАМАС Исроилдан 5 кунлик сулҳ сўради

Эвазига гаровга олинганларнинг бир қисмини озод қилишни таклиф этди.

Фото: AP

ҲАМАС етакчиларидан бири Али Барака Financial Times газетасига берган интервюсида 5 кунлик оташкесим эвазига гаровга олинган хорижликларнинг бир қисмини озод қилишини айтди.

Исроил фуқароларини озод қилиш учун қўшимча шартлар қўйилади, деб қўшимча қилди у. Шу билан бирга, Али Барака ҲАМАС асирга олинган исроиллик аскарларни қўйиб юбормаслигини ва уларни ўзаро асирларни алмаштириш учун қолдиришини айтди.

Исроил маълумотларига кўра, ҲАМАС аъзолари 229 кишини гаровда ушлаб турибди.

27 октябр куни Исроил мудофаа кучлари (ЦАХАЛ) Ғазо секторида қуруқлик операцияси кенгайтирилганини эълон қилди. Тошкент вақти билан соат тахминан 22:00 да Ғазо секторига оммавий зарбалар берилди. Оқибатда, ҳудудда алоқа ва интернет йўқолиб қолгани ҳақида хабар берилди. Шу билан бирга, сектор чегарасида Исроил танклари ва артиллерияси йўл олгани айтилди.

Тайёрлаган Сардор Юсупов

#Исроил #Фаластин #Ҳамас

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.