Афғонистонда «Ўзбекистон темирйўллари»нинг ваколатхонаси очилиши мумкин

Афғонистонда «Ўзбекистон темирйўллари» ваколатхонасини очиш ҳамда халқаро юк ташиш, божхона назорати ва фойдали қазилмали конларни ўрганиш каби бошқа масалалар муҳокама қилинди.

Фото: Инвестициялар, саноат ва савдо вазирлиги

Афғонистонда «Ўзбекистон темирйўллари» компаниясининг ваколатхонаси очилиши мумкин. Бу ҳақда Инвестициялар, саноат ва савдо вазирлиги матбуот хизмати хабар берди.

29 октябр куни бош вазир ўринбосари Жамшид Хўжаев Кобулда Афғонистон бош вазири ўринбосари Абдул Ғани Мулла Бародар билан учрашди. Унда томонлар Ўзбекистон ва Афғонистон ўртасида ҳамкорликни ривожлантиришга қаратилган масалаларни муҳокама қилди.

Кобулда ўтказилган учрашувларда «Сурхон — Пули-Хумри» электр узатиш тармоғи қурилиши лойиҳасини амалга ошириш, Ўзбекистоннинг Қобул ва Мозори Шариф шаҳарларидаги савдо уйлари фаолиятини қайта тиклаш ва жонлантириш имкониятлари кўриб чиқилди.

Фото: Инвестициялар, саноат ва савдо вазирлиги

Шунингдек, Афғонистонда «Ўзбекистон темирйўллари» ваколатхонасини очиш ҳамда халқаро юк ташиш, божхона назорати ва фойдали қазилмали конларни ўрганиш каби бошқа масалалар муҳокама қилинди.