Украина Қуролли кучлари Бош штаби ва Россия Мудофаа вазирлиги келишув амалга кирганини тасдиқлади. Ўт очиш Киев вақти билан соат 03:00, Москва вақти билан 04:00 дан тўхтатилган.
Украина Бош штабига кўра, «сукунат режими» белгиланган ҳудудда фақат гуманитар операция ўтказиш — шаҳарда қолганларга ёрдам етказиш ва уларнинг эркин чиқиб кетишига тайёргарлик кўриш учун жорий этилган. Россия Мудофаа вазирлиги ҳам гуманитар операцияга тайёргарлик муносабати билан Херсон йўналишида ўт очиш тўхтатилганини билдирган.
Гуманитар миссия 29 октябрга белгиланган
Украина президенти Володимир Зеленскийнинг маълум қилишича, ўт очишни тўхтатиш ва гуманитар миссияни бошлаш саналарини АҚШ таклиф қилган. «Сукунат режими» 27 октябрдан амал қилса, гуманитар миссия 29 октябрда бошланиши режалаштирилган.
Келишувга мувофиқ, Россия йўлларни миналардан тозалаши, Украина эса шаҳарда қолиб кетган аҳолини эвакуация қилишга тайёргарлик кўриши керак.
Зеленский вақтинча сулҳга эришишда АҚШ биринчи хоними Мелания Трамп воситачилик қилганини айтган. Оқ уй 23 октябрда эълон қилган баёнотда ҳам келишувни мувофиқлаштиришда унинг жамоаси муҳим рол ўйнагани қайд этилган.
Айни пайтда Зеленский Россия гуманитар эвакуация жараёнидан тарғибот мақсадида фойдаланиши мумкинлигидан хавотир билдирган. Унинг таъкидлашича, Киевнинг устувор мақсади — қамалдаги аҳолини қутқариш ва Украина назоратидаги ҳудудга етиб олишига ёрдам бериш.
Аҳолининг эҳтиёжлари уйма-уй ўрганилади
Мелания Трамп сўзларига кўра, Россия ва Украинанинг фуқаролик вакиллари Олешки аҳолисининг уйларига биргаликда бориб, уларга қандай ёрдам зарурлигини аниқлайди.
Эвакуацияни хоҳлаганларга ўзлари танлаган манзилга бориш учун транспорт ва зарур кўмак берилиши режалаштирилган. АҚШ биринчи хоними айрим аҳоли Россияга, бошқалари эса Украинага боришни танлаши мумкинлигини айтган.
Унинг маълум қилишича, вакилларга жараённи қайд этиш учун мустақил Америка медиа ташкилоти ходимлари ҳамроҳлик қилади.
Шаҳарда икки мингга яқин киши қолган
